Bohol gipalapdan ang sector sa pangisda

aron mapausbaw ang seguridad sa pagkaon

TAGBILARAN CITY, Bohol (PIA)--Aron mapausbaw ang produksiyon sa isda ug posibleng moubos ang presyo, mikabat sa 5,200 ka fingerlings ang gipundo sa pasilidad nga gipanag-iya sa probinsiya sa lungsod sa Ubay niadtong Agosto 20.

Ang fingerlings naglakip sa komon nga karpa, African catfish, pula nga tilapia, ug regular nga tilapia, nga gipundo sa 5,500 sq.m. pond sa Bohol Organic Agriculture Technology (BOATech) Center.

Kini nga mga fingerlings gipaabot nga mohatag og gibana-bana nga 4,400 kilos nga isda human sa upat ka bulan.

Ang mga maani nga isda ibaligya sa Kapitolyo pinaagi sa Office of the Provincial Agriculturist (OPA), nga naghatag og barato nga suplay sa isda sa mga residente sa Bohol.

Isip kabahin sa long-term nga estratehiya, ang Provincial Government of Bohol (PGBh) naglatid og plano alang sa usa ka hatchery network sa tibuok probinsya.

Kini nga inisyatiba nagtumong sa pagpausbaw sa lokal nga produksyon sa isda, pagpakunhod sa pagsalig sa mga tinubdan sa gawas, ug pagsulbad sa mga kabalaka mahitungod sa pagtaas sa presyo sa isda.

Gipangulohan ni Gobernador Erico Aristotle Aumentado, Provincial Administrator Asteria Caberte, Third District Board Member Nathaniel Binlod ug Provincial Agriculturist Liza Quirog ang pag-stock sa mga fingerlings, ingon man ang pagpananom sa kaugalingong tam-is nga matang sa nangka ug kamoteng kahoy sa Bohol.

Gisusi usab sa gobernador ang nagkalain-laing support facility ug ekipo sa pasilidad, lakip ang 130 ka pump boats, nga makapalig-on pa sa sektor sa pangisda sa probinsiya. (ECB/PIA7-Bohol)

Si Gobernador Erico Aristotle Aumentado, Provincial Administrator Asteria Caberte, ug Provincial Agriculturist Liza Quirog nanguna sa pag-stock sa mga fingerlings sa 5,500 sq.m. pond sa Bohol Organic Agriculture Technology (BOATech) Center sa lungsod sa Ubay niadtong Agosto 20. (ECB/PIA7-Bohol)