BYH dili una modawat

Og babaye nga CICL

TAGBILARAN CITY, Bohol (PIA)—Dala sa mga potensyal nga mga suliran kon buksan ug dungan ang serbisyo ngadto sa mga kababayen-an, dili manawat ang Bohol Youth Home (BYH) sa mga babaye nga children in conflict with the law (CICL) nga iduso alang sa temporaryo nga pagpuyo niini sa provincial youth rehabilitation center sa Cortes.

Kini ang gipadayag ni Provincial Social Welfare and Development Officer Carmelita Tecson, kang kinsa nga buhatan, natahasan sa pagsupervise ug pagdumala sa pagpadagan sa puloy-anan sa mga kabataan.

Madawat didto ang mga menor de edad nga criminal, 13 anyos ngadto sa ubos sa 18 anyos nga nakahimo og salaod ug nasentensyahan sa korte nga ipailawom sa pag-atiman isip bata nga criminal.

Subay sa Juvenile Justice Act, gidili sa balaod nga ang mga menor de edad nga makahimo og salaod, isagol sa prisohan sa mga hamtong, tungod sa dako niini nga posibilidad nga matakdan ug mahimo na hinuon nga bagtik nga criminal, hinungdan sa panginahanglan sa youth rehabilitation center.

Human sa pila na ka dekada, natukod ra gayud ug gibuksan ang BYH, nga maoy katumbas sa Bahay Pag-asa sa nasudnong kagamhanan.

Ug sanglit napabarug gamit ang P69 milyones nga pundo sa kagamhanan sa Bohol, ang lalawigan maoy magdumala niini subay usab sa mga lagda nga gipatuman sa Department of Social Welfare and Development (DSWD).

Gitukod sa usa ka luna nga iya sa kagamhanang probinsyal sa Bohol, ang pasilidad unta magkantidad og P80 milyones, apan wala kini kapundohi sa nasudnong kagamhanan, hinungdan nga ang P69M nga kwarta sa Bohol maoy gipaigo-an sa katukuran niini, matud ni Tecson.

Og sanglit, kuwang ang kwarta alang sa pagkompleto sa mga pasilidad alang niini, napabarug man ang dormitorya alang sa mga babaye nga manimuyo, wala pa mapahimutang ang labat nga maghuwa sa duha ka mga dormitoryo.

Matud mni Tecson, ang pagdili una sa pagdawat sa mga babaye, usa ka paagi sa paglikay unya sa pagsahog sa babaye ug lalaki nga children in conflict with the law (CICL), nga mahimong may dili maayong resulta.

Ang BYH nagsugod na og dawat sa mga lalaki nga CICL sa mi-aging semana bisan pa nga makigsabut pa usab ang BYH sa mga kalungsuran nga mopadala sa ilang mga kabataan sa pasilidad alang sa ilang tampo sa pagpatunhay sa operasyon sa restorative services niini. (PIABohol)

KUWANG PA SA PARIL. Kinahanglan nga mapahimutang ang paril nga maghuwa sa mga babaye nga CICL sa mga lalaki nga anaa na sa BYH, aron malikayan ang pagsagol sa mga CICL nga mahimong may dili maayong resulta, matud ni PSWDO Carmelita Tecson. Ang naa sa hulagway, ang female dormitory, samtang ang building nga tupad mao ang training center ug classrooms. (PIAbohol)