CHILDREN’S SAFETY ON MOTORCYCLES

Bata nga makagakus, maka-abut

sa tumbanan sa motor, di’ dakpon

TAGBILARAN CITY, Bohol (PIA)—Agi og pagpadayag sa pagpanalipod sa kagamhanan sa mga kabataan samtang anaa sa kadalanan, patutokan sag a tinugyanan ang pagpasakay sa mga motorsiklo sa mga kabataan.

Kini maoy gipasabut ni Land Transportation Office Regional Operations Chief Aden Belza, didto sa Press Conference nga gipatawag sa LTO ug gitambayayongan sa Kapitolyo pinaagi ni Gob Erico Aristotle Aumentado.

Subay sa Republic Act 10666 o ang Children’s Safety on Motorcycles Act of 2015, dakpon kay illegal ang gibuhat sa us aka driver nga magmaneho og motorsiklo sa mga pangpublikong dalan nga nagkarga og bata nga ubos pa sa 18 ang edad.

Hinuon, mahimo kon ang bata nga sakay, nagkinahanglan sa dinali-an nga medical nga pagtagad ug kinahanglang mapadala dayon sa labing duol nga pasilidad nga makaatiman niini.

Ikaduha, mahimo usab basta ang bata nga sakay, maka-abut na ang iyang tiil sa standard nga tumbanan (foot-peg) sa motorsiklo, ug mag-abut na ang kamot sa bata kon mogakos sa hawak sa nagmaneho sa motorsiklo.

Ikatulo, kinahanglan gihapon nga ang bata, nagsul-ob sa standard nga protective helmet.

Sa mga madakpan nga nakalapas niini, P3 mil, P5 mil ug P10 mil apil na ang pagsuspenso sa lisensya sa driver ang mahitabo sa ika tulo nga higayon nga kini madakpan.

Dugang pa, kon sa pagpasakay sa bata, nahitabo nga kini naa-ngol o nakabsan sa kinabuhi samtang nakasupak ang driver sa RA 10666, usa ka tuig nga pagkapriso ang ipatuman sa driver o operator sa motorsiklo, lahi pa sa silot nga dala sa balaud.

Ang hugot nga pagpatuman niini, magsugod sa Septembre, human nahangyo ni Gob Aumentado ang LTO nga hatagan ang mga Bol-anon sa higayon nga ikapakatag ang kasayuran ug ikapaayo sa mga suliran sa ilang mga sakyanan. (PIABOhol)

MAKAGAKOS, MAKAABUT SA TUMBANAN. Hangtud ang bata makagakos na samtang mag-abut ang mga kamot sa hawak sa nagmaneho sa motor ug makaabut na sa tumbanan sa sakyanan, basta naghelmet lang usab, dili na dakpon, pasabut sa LTO didto sa Press Con kauban ni Gob Aris Aumentado. (PIABohol)