HDPE tilapia fish cages itugyan

Sa mga may dagko’ng tubigan

TAGBILARAN CITY, Bohol (PIA)—Aron makatabang sa pagpadaghan sa seguridad sa pagkaon, itugyan ngadto sa pito ka mga mag-uuma nga nahugpong ug migamit sa patubig sa National Irrigation Administration (NIA) ang mga High Density Polyethelene (HDPE) Fish Cages ug ang pagsabod og mga piso sa tilapia didto sa Bayongan Dam, Agosto 20, 2025.

Mismo si Gobernador Erico Aristotle Aumentado, kauban ni NIA Acting Regional Director Engr. Eusebio Villamanto ug Bureau of Fisheries and Aquatic Resources (BFAR) Regional Director Mario Ruinata ang motimbang sa gobernador, kinsa, kauban sa Provincial Agriculturist Liza Quirog, una nga misugyot nga gamiton ang katubigan nga napundo sa mga dams sa NIA aron pamuhi-an og tilapia.

Human nakakuhag pagtugot sa Sangguniang Panlalawigan, sa abag usab sa pundo ug dugang kahinguhaan sa mga local nga kagamhanan, nahulma ang laraw pinaagi sa pagpamuhi sa mga mag-uuma sa tilapia, agi og dugang kasaligan nga tinubdan sa panginabuhian.

Mismo si Gob Aumentado ang mingpalubad nga kinahanglan na nga mangita og lain pang tinubdan sa supply sa isda, sa nagkanihit nga kuha sa isda sa dagat, ug sa nagkalayo na sa mga panagatan nga halos dili na maabut og bugsay sa mga kabus nga mangingisda.

Matud ni BFAR Bohol Candido Samijon, ang HDPE maoy labing bag-o nga desinyo nga napamataud-an na nga mas lig-on kon itandi sa daan nga mga desinyo sa fish cage nga migamit sa mga kawayan.

Sa ceremonial nga pagtugyan, modawat sa mga fish cage package nga gitanyag sa BFAR ang mga mag-uuma nga sakop sa San Miguel Tilapia Growers Association sa Bayongan, Ilaya Tilapia Glowers Association sa Ilaya Dam sa Ubay, Awhan Zamora Farmers Association sa Zamora Talibon, Guinob-an Tilapia Growers Association sa Sevilla, Barangay Farmers’ Technicians Association sa Pilar, Valladolid Farmers’ Palayamanan Association sa ug Loay Farmers Association.

Sa kasayuran gikan sa BFAR, ang matag HDPE fish cage, nga kabahin sa aquaculture development program sa ahensya, nagkantidad og P650 K ngadto na sa P1 M, kay usahay mahilakip na niini ang paghimo sa cage, pokot, ikapalit sa commercial feeds, tilapia fingerlings, mga baroto, ug ang bayad sa kahago sa mga sakop, kinsa mag-atiman niining fish cages sulod sa usa ka cropping.

Niini usab, gilauman nga maka-harvest ang mga mag-uuma og katumbas sa P1.5M nga ikadugang sa ilang kita. (PIABohol)

TILAPIAHAN. Iyawat ikadugang sa suplay sa isda samtang nagnihit kini, gitabangan sa Kapitolyo, BFAR ug NIA ang pagpagamit sa mga katubigan aron buhian og tilapia, agi og dugang sa kita usab sa mga mag-uuma. (PIABohol/BFAR)