P1.9 B sa P11.9 B sa DepED

SBFP para ipalit og gatas

CANDIJAY, Bohol (PIA)—Dako og ikatabang ang P11.9 bilyones nga school-based nutritional feeding program (SBFP) ngadto sa mga mag-uuma sa Bohol nga nag-alima sa mga hayopan para gatasan, kini maoy gibutyag sa usa ka opisyal sa Department of Education, atul sa pagpahigayon sa ika 9 nga Bohol Dairy Festival dinhi.

Gibutyag ni DepED Undersecretary for Government Relations, Trygve Olaivar, nga sa kinatibuk-an nga pahat sa DepED alang sa nationwide SBFP, P1.9 bilyones niini, napahat alang sa pagpundo sa pagpalit og gatas nga idugang sa nutritional feeding sa tumbok nga mga kabataan.

Napili nga benepisaryo sa SBFP mao tong mga kabataan nga wala matubo kon basehan ang ilang edad ug timbang, kadtong mga potot ug mga tataw nga kuwang ang ilang mga nutrina nga nakuha sa ilang mga gikaon sa balay.

Kini gikan sa kindergarten ngadto sa Grade VI, ug sila paga=abagan sa duha ka buwan ngadto sa upat ka buwan nga pagpakaon, sa SBFP Nutritious Food Products (NFP).

Kini naglakip na sa gatas ug mga pagkaon nga taas ang nutrina nga makuha.

Sulod sa 43 ka adlaw, paimnn ang bata og gatas, nga nakuha usab gikan sa local nga supply nga gikan sa mga gigatasan nga mga hayopan sama sa baka, kabaw ug kanding.

Dinhi sa Bohol, ang gatas sa baka gikompra sa DepED gikan sa mga mag-uuma sa tag P40 and litro, samtang ang gatas sa kabaw, gipalit sa tag P70 ang litro.

Niini, may pundo sa goberno nga, inay adto paingon sa pagpalit sa imported nga gatas, kini adto na mopaingon sa mga mag-uuma nga nag-alima sa mga hayon gogatasan, matud ni Usec Olaivar.

Nunot usab niini, naglaum ang opisyal nga mapun-an pa ang alokasyon alang sa gatas kay kini, makatabang og daku sa mga mag-uuma, kinsa nagtabang usab sa pagbuntog sa suliran sa malnutrisyon sa nasud.

Sa katungod ni Gob Erico Aris Aumentado, mipundo na ang Kapitolyo og P6.8 milyones agi og abag sa produksyon sa gatas sama sa pagpatukod og nga gatasanan (milking parlors), stainless steel nga sudlanan sa gatas, ug mga suporta nga ekipo niini samtang gikan sa 2023, nagpundo na usab og ipadayon ang P10 milyones nga alang sa programa sa pagpanghatag og gatas ug milky bun sa mga kabataan aron mahatagan sa lig-ong pundasyon sa nutrisyon alang sa pagpadako sa kabataan nga himsug. (PIABohol)

MAHIMONG SUMBANAN. Matud ni DA Assistant Secretary Benjamin Albarese, karon lang siya nakasuway og tambong og provincewide dairy festival, butang nga angayan himoan og template aron masundog sa uban. Sa suporta sa Administrasyon ni Gob Erico Aris Aumentado, may tag P10M na matag tuig alang sa nutritional feeding sa mga kabataan nga maggamit sa gatas gikan sa local nga mga umahan. Kini ang gisaulog sa 9th Dairy Festival sa Bohol. (PIABohol)