P53M alang sa mga prayoridad nga

Proyekto sa Tinibgan, papundohan

TINIBGAN, MARIBOJOC, Bohol (PIA)—Kinatibuk-an nga P53 milyones ang natumbok s amga katawhan niining barangay isip prayoridad nga mga proyekto alang sa mas paspasa nga kaugmaran sa barangay, kini segun sa giduso nga laraw nga gipadayag atul sa Dagyawan sa Barangay didto sa Barangay Hall, Agosto 12.

Ang Dagyawan, nga nagpasabut og bayanihan, mao nay nahimong pamaagi sa goberno aron pamati-on ang mga tawo sa ilang mga buot mahitabo sa komunidd agi og abag sa ilang pagpaningkamot nga mapa-uswag ang ilang kahimtang.

Napauso human lagdai ni kanhi Presidente Rodrigo Duterte ang whole-of-nation approach sa pagpukan sa insurhensya, ug hangtud na gani sa tanan nga matang sa giplano nga kaugmaran.

Ang Tinibgan, usa sa mga lugar nga kanhi, nahimong pugaran sa mga armadong grupo nga walhon, apan nabiyaan na human ang mga rebelde mongkagiw sa ubang lugar.

Nahimong usa sa mga hilit nga lugar nga halayo sa kaugmaran, daghan ang mga tawo sa barangay ang nangandoy og maayong kinabuhi apan kini nahikaw kanila.

Karon nga nabuntog na ang mga rebelde, gipaduol sa goberno ang serbisyo aron mabati kini sa katawhan, pinaagi sa Dagyawan.

Ug didto, natumbok sa katawhan ang ilang mga buot nga unahon sa goberno alang sa ilang kaugmaran.

Kini nga papundohan sa goberno pinaagi sa Department of Public Works and Highways ang P20 milyones nga pagpasemento sa natumbok nga Farm to Market Road, P20 milyones sa Evacuation center, P1 milyon nga Elementary School Pavillion, P3 milyones nga pagpalabat sa eskwelahan ug lain pang P2 milyones nga slope protection works.

Gikan usab sa National Irrigation Administration, buot sa katawhan ang P5 milyones nga pagpaugmad sa patubig samtang gikan sa Department of Interior and Local Government: ang P2 milyones nga garbage truck ug lain nga P1.5 milyones nga rescue vehicle.

Ang gikan sa DILG, mahimong kapundohan sa Retooled Community Support Program. (PIABohol)