Padayong kolaborasyon sa pagpatuman sa Sustainable

Livelihood Training Program gilagdaan sa ATI-7 ug RAFI

TAGBILARAN CITY, Bohol (PIA)--Ang Agricultural Training Institute–Region VII (ATI-7) ug ang Ramon Aboitiz Foundation Inc. Microfinance (RAFI MFI) bag-o lang nipahigayon og seremonyal nga paglagda og memorandum of agreement (MOA) alang sa pormal nga pagmatuod sa ilang padayon nga pakigtambayayong sa pagpatuman sa Sustainable Livelihood Training Program.

Ang paglagda gipahigayon niadtong Hulyo 31, 2025, sa syudad sa Tagbilaran, ug gipasiugdahan sa RAFI MFI.

Bisan tuod nagsugod ang pagpatuman sa programa ubos sa pamunoan ni kanhi ATI-7 Center Director Gracia Arado, nalangan ang pormal nga paglagda sa MOA. Tungod niini, ang seremonyal nga kalihokan nagpakita kang Dr. Arado nga maoy milagda isip pag-ila sa iyang mahinungdanong tahas sa pagtukod ug pag-amuma sa pakigtambayayong sa RAFI. Kauban niya si Doris Isabel J. Racho, ang ATI-7 focal person ug katugbang sa RAFI, kinsa aktibong nakig-koordinar sa training activities.

Kini nga kolaborasyon, nga karon misulod sa ilang ikatulo nga tuig, nagpakita sa gahum ug potensyal sa public-private partnerships (PPP) sa pagdala sa inklusibo ug malungtarong kalamboan sa lokal nga komunidad.

Pinaagi sa paghiusa sa kinabag-an sa RAFI ug sa teknikal nga kahanas sa ATI, ang Sustainable Livelihood Training Program naghatag og gahum sa mga kliyente sa microfinance ug mga marginalized nga indibidwal pinaagi sa praktikal, nakabase sa kahanas nga pagbansay nga makaabli sa mga pultahan sa entrepreneurial ug income-generating nga mga oportunidad.

Gikan sa pagsugod niini nga adunay 15 ka mga partisipante sa 2022, ang programa nakakita sa usa ka mahinungdanong pagsaka sa pakiglambigit diin 90 ka nabansay nga benepisyaryo ang natala sa 2023, ug 129 sa 2024.

Sa ceremonial signing, 171 ka indibidwal na ang nakabenepisyo karong tuiga ug ang numero gilauman nga mosaka diin daghang mga sesyon pa ang naka-linya.

Ang seremonyal nga paglagda nagsilbi nga usa ka selebrasyon sa pasalig, pagtinabangay, ug gipaambit nga kalampusan nga nagpasiugda sa mahikap nga epektong madala sa lig-on nga institusyonal nga panag-uban sa mga komunidad nga naningkamot alang sa mas maayong panginabuhian.

Mitambong atol sa seremonyas ang mga representante sa RAFI MFI, lakip sila CEDS Direktor Joni Joy Dumasig, CTD Senior Supervisor Christine Ango, Bohol District Area 1 Manager Lelanie Lim, ug uban nilang Kathleen Rayla, Jessie James Rollorata, Vince Gil Pajares, Stephen Paculaba, ug Fatima Aro. (ECB/PIA7-Bohol)

Sa pagsulod sa ikatulo ka tuig nga pakigtambayayong, ang Agricultural Training Institute–Region VII (ATI-7) ug ang Ramon Aboitiz Foundation Inc. Microfinance (RAFI MFI) nipahigayon og seremonyal nga paglagda og memorandum of agreement (MOA) alang sa pormal nga pagmatuod sa ilang padayon nga pakigtambayayong sa pagpatuman sa Sustainable Livelihood Training Program niadtong Hulyo 31, 2025, sa syudad sa Tagbilaran. (ATI-7 photo)