ESPESYAL NGA EXHIBIT SA NM

Kasaysayan sa nasud pinaagi

Sa pagtuki sa sensilyo niini

TAGBILARAN CITY, Bohol (PIA)—Gikan sa labing una nga mga sensilyo ngadto na sa mga bag-o nga mga kwarta nga gigamit pa sa sirkulasyon, kini nagpadayag sa mga sugilanon sa kasaysayan nga mahimong wala na ikasuwat sa mga libro.

Kini maoy napadayag didto sa National Museum Bohol sa pagbukas niini sa Sensilyo Exhibit, nga nagpadayag og balik sa labing karaang tugbang sa patigayon human sa barter: gikan sa piloncitos ngadto na sa mickey mouse money nga kwarta sa panahon sa Hapon.

Giingon nga ang paggawas sa mga piloncitos sa panahon sa pagdumala sa Espanya, nga ang bili niini, nagdepende sa kabug-aton sa timbang niini katumbas sa bulawan o plata, tumbok ni Michael Amores, usa ka kolektor sa mga karaang sensilyo ug Chairman sa Philippine Cultural Heritage Research Foundation atul sa pagbukas sa exhibit diha sa National Museum Bohol.

Sukad sa panahon sa binayloay isip maoy batakan nga pamaagi sa patigayon, napagawas ang mga piloncito nga dala sa mga Kastila, ug gidawat usab sa mga Pilipino, ilabi na sa katumbas niining timbang sa mga metal.

Sa pagpakig-alayon sa Sigala Arts and Cultural Heritage Research Foundation, gibuksan sa exhibit sa tumong nga tun-an ang us aka dagway sa kasaysayan nga napatik sa sensilyo sa nasud.

Ug nunot sa kasaulogan sa National History Month ug ASEAN Month, gitanyag sa NM Bohol ug sa SIGALA Arts and Cultural Heritage Research and Development Foundation, Inc., inabagan sa Center for Culture and the Arts Development sa kagamhanang probinsyal (pinaagi sa Bohol Arts and Cultural Heritage Council), ang espesyal nga exhibit nga gihinganlan og: “SENSILYO: From Piloncito to Piso, ug nag feature sa mga kwarta sa Bohol sa panahon sa Hapon.

Gani, dili lamang exhibit, kon dili lakip na usab ang mga lectures aron mas mapalawman pa sa katawhan ang pagtagad sa sensilyo, ilabi na sa kasaysayan nga napadayag sa matang sa sensilyo nga gitunol-tunol ug gihuptan sa mga katawhan.

Ang Sensilyo Exhibit sa atrium sa National Museum Bohol, modagan sa tibuok buwan sa Agosto ug kuygan sa mga lectures sama sa mahitabo sa alas 2:00 sa hapon, Agosto 5.

Libre nga public lecture gikan sa alas 2:00 nagdto sa alas 6:00 sa gabii ang itanyag ni Amores, CPA, kinsa maghisgut sa pito ka mga topics lakip na ang kagikan sa kara-ang piloncitos, sa pagpahulma sa peso, mga sensilyo sa panahon sa pagsakop s anasud, kwarta sa panahon sa guira, mga kwarta nga iya sa mga kalungsuran o rehiyon, desinyo ug ang ipasabut niini lakip na ang importyansya sa sensilyo sa paghulma sa Pilipinas ug sa pagpangdumala niini.

Niini, giawhan ni l, Director II for Visayas National Museums, nga si Atty. Ma. Cecilia U. Tirol ang mga Bol-anon nga dili sipyaton ang pagduaw sa museum aron makit-an ang kasaysayan pinaagi sa pagtuki sa mga sensiyo, kay dili kini hangtud sa hangtud. (PIABohol)

BISA’G DIYOY, WA. Sa karaang pinulongan, ang diyoy, katumbas sa tunga sa usa ka daku, nga gipahimo sa mga Amerikano aron may ikabayad sa mga paliton kaniadto. Hinuon, ang gikuptan ni Amores, kwarta nga plata nga karaan, giingong nahalin og P160 mil, tungod sa timbang sapuro nga plata nga gihimo niini. Kini nga mga kwarta makit-ans a NM Bohol sa buwan sa Agosto. (PIABohol)