RTWPB miaghat pagpadayag sa

Wage increase position papers

TAGBILARAN CITY, Bohol (PIA)— Giawhag sa Regional Tripartite Wages and Productivity Board (RTWPB) sa Region VII ang mga apektadong sector sa pamuo sa pag-apil pinaagi sa pagduso sa mga position papers kabahin sa sugyot sa usbaw sa suholan, kini samtang gisugdan na sa bahan ang mga public hearings alang niini.

Importante nga madawat naas sa Rehiyon ang mga position papers aron mas dali nga matimbang sa bahan ang panginahanglan sa pagpa-usbaw o hinuon ang pagpabilin sa minimum nga suholan sa mga trabahante sa pribadong sector.

Pinagi sa pagdungog sa publiko (Public Hearings), paminawon sa RTWPB kon aduna na ba’y panginahangglan’g patas-an pa ang inadlaw nga suholan sa mga trabahante sa pribadong sector ug mga katabang sa Central Visayas.

Nagpapatik na niadtong Agosto 3 sa Notice of Public Hearing si RTWPB Chairperson Dir. Roy L. Buenafe, ug ang hearings magsugod na sa Agusto 19, 2025, samtang mosubay ang RTWPB sa upat ka mga lugar sa Central Visayas alang niini.

Sa Agosto 19, sa als 1:00 P.M, adto ang pagdungog sa Pavilion Hall, sa DEPED Ecotech Center, Sudlon Lahug, Cebu City.

Sa Agosto 28, 2025, sa may alas 8:00 A.M, adto na usab ang RTWPB sa Joshua 1, Bethel Guest House, Rizal Blvd., Dumaguete City, Negros Oriental

Inig ka Agosto 29, 2025 sa may alas 8:00 A.M, dinhi na usab ang pagdungog sa Tagbilaran City diha sa Ruby Hall, The MetroCentre Hotel and Convention Center, C.P.G. Ave., Tagbilaran City, Bohol.

Sa pagka Agosto 31, 2025, kini nga petsa gitagana alang sa mga katabang, sa ala 1:00 P.M adto sa Continental Hall, Anjo World Convention Center, Upper Calajoan, Minglanilla, Cebu.

Ang pagpatawag sa mga pagdungog, nahasubay sa Rule III Section 3 National Wages and Productivity Commission (NWPC) Guidelines No. 3 Series of 2020, nga giila usab nga Omnibus Rules on Minimum Wage Determination.

Kini nagtugot sa RTWPB sa paghimo sa mga Public hearings sa dili pa ang 60 ka adlaw sa panahon nga ang una’ng wage increase, matuigan na sa pagpatuman.

Kahinumduman nga ang katapusang wage order, ang Wage Order ROVII-25 nahimong gipatuman niadtong Octobre 2, 2024, mao nga magsugod ang public hearings sa Agusto 3, 2025 isip adlaw nga sinugdanan sa 60-adlaw.

Kasamtangang gilansang sa RTWPB segun sa katapusang wage order ang suholan sa mga katabang sa P 6,000 alang niadtong anaa sa mga Chartered Cities ug First Class Municipalities ug P 5, 000 alang niadtong anaa sa uban nga mga kalungsuran subay usab sa Wage Order No. ROVII-D.W. 04, nga gipagawas niadtong Mayo 11, 2024.

Nunot niini, human sa usa ka tuig, angayan na usab nga matuki ang nahisgutan nga suholan.

Ang RTWPB gimanduan sa tinuig nga pagtimbang ug pagtumbok sa minimum nga suholan, samtang maghunahuna usab sa makiangayon, ug angay nga suholan subay usab sa polisiya sa pagpanalipod batok sa gagmay nga suholan sa mga mamumuo, samtang nagtan-aw usab sa kahimtang sa katilingaban ug sa iyang ekonomiya.

Partikular na niini ang pag-ila sa kamahinungdanon sa lukop nga paghisgut-hisgut sa tanang sector, apil na niini ang mga kahugpungan sa mga mamumuo, kahugpungan sa mga negosyante, opisyales sa kagamhanan, ug uban pang stakeholder aron ilang ikapadayag ang ilang mga baruganan subay niini.

Sa resulta niining himoon nga mga public hearing maoy basehan sa RTWPB sa pagtumbok sa bag-ong minimum nga suholan, ug kon kini maaprobahan na sa NWPC, ikapatuman sulod dayon sa 15 ka adlaw human kini unang gikamantala sa lukop sa rehiyon.

Ang mga pundok ug indibidwal nga interesado sa nahisgutang Public Hearing, giaghat nga una na nga moregister pinaagi sa https://bit.ly/2025R7PublicHearing.

Kadtong mga adunay iduso nga position papers, makigsabut sa RTPWB VII aron unang maduso ang papeles sa RTWPB VII, 6 th Flr., DOLE Bldg., Gorordo cor. Gen. Maxilom Ave., Cebu City o ipadala sa email sa rb7@nwpc.dole.gov.ph sugod sa Agusto 03, 2025 ngadto sa Septembre 01, 2025. (PIABohol)