C. Visayas wage board magpahigayon

og konsultasyon sa salary adjustment

TAGBILARAN CITY, Bohol (PIA)--Ang Regional Tripartite Wages and Productivity Board (RTWPB) 7 (Central Visayas) gitakdang mopahigayon og public hearings aron makakuha og impormasyon ug opinyon sa mga stakeholders sa pag-adjust sa minimum wage range sa rehiyon.

Ang board mopahigayon og upat ka public hearings sa Cebu, Negros Oriental, ug Bohol gikan sa Agosto 19 hangtod 31.

Ang unang public hearing ipahigayon sa DepEd Ecotech Center sa Sugbo karong Agosto 19.

Kini sundan sa public hearing sa Bethel Guest House sa Dumaguete City, Negros Oriental sa Agosto 28.

Duha pa ang ipahigayon sa MetroCentre Hotel & Convention Center sa Tagbilaran City, Bohol sa Agosto 29 ug sa Anjo World Convention Center sa Minglanilla, sa Sugbo sa Agosto 31.

Ang mga interesado mahimong magparehistro pinaagi sa bit.ly/RB7PublicHearing.

Ang mga partido mahimong mosumiter og mga position paper sa buhatan sa RTWPB-7, 6th Floor, DOLE Building, Gorordo cor. Gen. Maxilom Avenue, Cebu City o pinaagi sa email sa rb7@nwpc.dole.gov.ph gikan Agosto 3, 2025 hangtod Setyembre 01, 2025.

Ang kataposang wage order nga giluwatan sa RTWPB-7 miepekto niadtong Oktubre 1, 2023, nga nagtakda sa inadlaw nga minimum nga suholan ngadto sa P468 alang sa non-agricultural sector samtang P458 alang niadtong nagtrabaho sa sektor sa agrikultura. (ECB/PIA7-Bohol)