Zero billing sa DOH-run hospitals sa nasud

wala magkinahanglan og dugang requirements

TAGBILARAN CITY, Bohol (PIA)--Gi-klaro sa Department of Health (DOH) nga walay dugang requirements nga angay i-andam ang mga Filipino alang sa “Zero Billing” policy sa 87 ka DOH-run hospitals sa tibuok nasud.

Matud pa sa gipagawas nga pahayag sa ahensya, wala gi-obliga sa Philippine Health Insurance Corporation (PhilHealth) ang publiko alang sa dugang dokumento sa mga pasyenteng mokuha sa polisiya nga giila usab isip “No Balance Billing” policy, sa bisan asang DOH-run hospital.

“Walang anumang interview na kinakailangan dahil ang lahat ng Pilipino ay miyembro ng PhilHealth alinsunod sa Universal Health Care Law,” matud pa sa pahayag sa DOH niadtong Biyernes, Agosto 2.

“Bilang miyembro, lahat ng Pilipino—may kakayanan man o wala na magbayad ng kontribusyon—ay garantisado sa No Balance Billing kung sila ay maa-admit sa basic o ward accommodation,” dugang pahayag sa DOH.

Giseguro sa DOH sa publiko nga padayon ang PhilHealth sa pagsiguro sa patas nga akses sa serbisyong panglawas sa tanang Filipino.

Kahinumduman nga una nang gipahayag ni DOH Kalihim Teodoro Herbosa nga ang tanan, unsa man ang ilang socioeconomic status, mahimong ma-admit sa basic accommodation o ward accommodation sa bisan asang 87 ka DOH-run hospitals sa tibuok nasud nga dili na kinahanglang magbayad.

Si Herbosa nagkanayon nga nagsugod ang DOH sa pagpatuman niining programa niadtong Mayo 18.

Sa lalawigan sa Bohol, ang Gov. Celestino Gallares Memorial Medical Center sa syudad sa Tagbilaran ug ang Don Emilio del Valle Memorial Hospital sa lungsod sa Ubay ang nalakip sa 87 ka DOH-run hospitals. (ECB/PIA7-Bohol)

Gi-awhag sa Regional Tripartite Wages and Productivity Board (RTWPB) 7 (Central Visayas) ang mga stakeholder nga moapil sa mga public hearing nga labing duol kanila. (RTWPB-7)