Bohol gipasidunggan sa IACAT-7 tungod

sa mga paningkamot niini batok sa OSAEC

TAGBILARAN CITY, Bohol (PIA)--Ang kagamhanang probinsiyal sa Bohol gipasidunggan sa Inter-Agency Council Against Trafficking (IACAT) Region 7 tungod sa paningkamot niini sa pagpanalipod sa mga bata pinaagi sa pagpalabang sa Anti-Online Sexual Abuse and Exploitation of Children (Anti-OSAEC) ordinance.

Niadtong Abril 8, 2025, ang Sangguniang Panlalawigan nipalabang og ordinansa, nga gisulat ni Second District Board Member Jamie Aumentado-Villamor, nga nagpakita sa lig-on nga pasalig sa probinsiya sa child online safety.

Gidawat mismo ni Villamor ang award of recognition atol sa seremonyas nga gipahigayon sa Cebu Port Authority niadtong Hulyo 30.

Ang pasidungog gihatag sa IACAT-7, sa koordinasyon sa Department of the Interior and Local Government (DILG), Department of Justice (DOJ), ug Department of Social Welfare and Development (DSWD).

“This ordinance is the fruit of collaboration with child rights advocates, NGOs, law enforcement agencies, IBP-Bohol, prosecutors, educators, business owners, tourism stakeholders, and most importantly, survivors and their families,” matud pa ni Villamor.

Ang ordinansa nagtinguha sa pag-establisar og lig-on nga mga mekanismo sa pagpugong, pagpataas sa kahibalo sa publiko, pagpalambo sa koordinasyon sa nasudnong mga ahensya, ug pagsiguro sa access sa hustisya ug suporta nga mga serbisyo alang sa matag bata sa Bohol.

Si Villamor naglaum nga ang pag-ila makadugang sa padayon nga pasalig, dili lamang sa pagpatuman sa balaod nga may kaluoy ug pagkamabinantayon, apan sa kanunay nga pag-uswag ug pagpalapad sa lokal nga mga lakang aron makamugna og mas luwas, mas makaamuma nga mga luna alang sa mga bata online ug offline.

Gidugang niini nga ang pag-ila iya sa tanan nga miapil sa panaw sa pagpanalipod sa mga bata ug nagpasalamat kini sa Sangguniang Panlalawigan ug kang Gobernador Erico Aris Aumentado sa ilang suporta.

Si Presidente Ferdinand R. Marcos Jr. sa miaging tuig nag-awhag sa gobyerno ug sa publiko sa paghimo og kolektibong aksyon ug paningkamot sa pagwagtang sa mga kaso sa OSAEC atol sa “Iisang Nasyon, Iisang Aksyon: Tapusin ang Online Sexual Abuse or Exploitation of Children (OSAEC) Ngayon Summit 2024” sa Makati City.

Gihatagan og gibug-aton sa Presidente ang panginahanglan alang sa gobyerno nga palig-onon ang mga paningkamot batok sa sekswal nga pagpahimulos sa mga bata online. (ECB/PIA7-Bohol)

Si Board Member Jamie Aumentado Villamor, kinsa maoy nagsulat sa ordinansa, nidawat sa award of recognition atol sa seremonyas nga gipahigayon sa Cebu Port Authority niadtong Hulyo 30. Ang pasidungog gihatag sa IACAT-7, uban sa koordinasyon sa Department of the Interior and Local Government (DILG), Department of Justice (DOJ), ug Department of Social Welfare and Development (DSWD). (photo credit: Villamor Jamie Aumentado FB)