‘Sumbong sa Pangulo’ flood control tracker gilusad

TAGBILARAN CITY, Bohol (PIA)--Gilusad ni Presidente Ferdinand R. Marcos Jr. ang "Sumbong sa Pangulo" nga website niadtong Lunes, ug nag-awhag sa publiko sa pagtuman sa ilang civic nga katungdanan pinaagi sa direktang pagtaho kaniya sa bisan unsang nonoperational o anomalous nga flood control projects sa ilang mga lugar.

Ang website, sumbongsapangulo.ph, gimugna subay sa mando sa Presidente atol sa iyang ikaupat nga State of the Nation Address (SONA) sa pag-imbestigar sa mga iregularidad sa flood control projects tungod sa balikbalik nga kaylap nga pagbaha sa panahon sa bagyo.

Si Marcos miingon nga ang gobyerno mohimo og aksyon batok sa tanan nga makit-an nga nalambigit sa korapsyon ug pagwaldas sa pondo sa publiko sa mga proyekto sa pagpugong sa baha.

Sa usa ka press conference sa Palasyo sa Malacañan niadtong Lunes, gipasiugda sa Presidente ang kamahinungdanon nga tahas sa publiko sa imbestigasyon, ingon nga ang mga ordinaryong lungsuranon ang labing apektado sa pagbaha.

“Lahat ng hinaing ninyo- masama loob ninyo, nagrereklamo kayo, frustrated kayo dahil nakikita ninyo wala naman kayong malapitan. Ito na ‘yung chance ninyo. Mayroon na tayong website,” matud pa ni Marcos.

“Ang isusulat ninyo doon sa report, ako mismo ang babasa. ’Yan ang asahan ninyo, babasahin ko bawat isa,” pasalig pa sa Presidente.

Ang Hepe Ehekutibo miingon nga ang website ma-access ug dali gamiton.

“Basta ilagay ninyo ‘yung barangay ninyo at lalabas na lahat ng flood control project,” dugang pa niini.

Base sa report sa Department of Public Works and Highways (DPWH), mokabat sa 9,000 ka flood control projects ang nahimo sa miaging tulo ka tuig.

Ang Presidente miingon nga ang imbestigasyon makabenepisyo og dako gikan sa impormasyon nga direktang gihatag sa nagpakabana nga mga residente, lakip ang mga litrato ug video.

Ang website adunay usa ka interactive nga mapa nga nagtugot sa publiko sa pagpangita sa flood control projects sa ilang lugar, pinaagi sa paggamit sa search box o pinaagi sa pag-klik sa color indicators nga gipakita sa mapa.

Gikategorya sa website ang mga proyekto sa tuig sa pagkompleto gamit ang color coding.

Ang mga detalye nga gihatag alang sa matag proyekto naglakip sa ngalan sa proyekto, giaprobahan nga budget, gasto sa kontrata, distrito sa lehislatibo, kontraktor, eksaktong lokasyon, petsa sa pagsugod, tuig sa pagpondo, ug petsa sa pagkompleto. (ECB/PIA7-Bohol)

Isip pagtuman sa saad ni Presidente Ferdinand R. Marcos Jr. sa pagpakita sa publiko sa listahan sa flood control projects, gilusad sa Presidente niadtong Agosto 11 ang sumbongsapangulo.ph diin makita sa publiko ang listahan sa mga proyekto ug mahimong mo-sumbong kung may makitang anomalya. (PCO-PIA)