Online gambling gibawal sa DILG

sa tanang personnel, LGU officials

TAGBILARAN CITY, Bohol (PIA)--Ang Department of the Interior and Local Government (DILG) nipagawas og kamanduan niadtong Martes, Agosto 12, nga nagdili sa tanang mga personahe niini, mga empleyado ubos sa pagdumala sa departamento ug mga napili ug gitudlo nga mga opisyal sa lokal nga gobyerno sa tibuok nasod nga moapil sa tanang matang sa online nga sugal, lakip na ang pag-access sa mga online gambling platforms.

Sa usa ka pahayag, ang DILG mipasabot nga ang Memorandum Circular (MC) 2025-082 subay sa 1987 Constitution, Republic Act (RA) 6713 ug kasamtangan nga presidential issuances, nga nag-ingon nga ang kasamtangan nga pagdili sa sugal sa casino nga maglakip sa mga online platform, diin ang departamento miinsistir nga maghatag og patas, kon dili mas dako nga hulga sa serbisyo publiko.

Ang DILG mipagawas sa maong direktiba tungod sa mga taho nga nagbutyag nga daghang opisyal ug empleyado sa gobyerno ang nalambigit sa mga kalihokan sa online nga sugal nga nakaapekto sa paghatag sa dekalidad nga serbisyo publiko.

“Public office is a public trust. Engaging in online gambling undermines the credibility of our institutions and diverts public servants from their sworn duty to serve with integrity, competence, and loyalty,” matud pa sa gipagawas nga circular.

Dugang pa, nanawagan ang DILG sa tanang opisyal sa publiko ug sa mga kawani niini nga manubag sa katawhan sa tanang panahon, mag-alagad kanila uban ang tumang responsibilidad, integridad, pagkamaunongon ug kahusayan, molihok uban ang patriyotismo ug hustisya ug magkinabuhi nga kasarangan.

Nipasidaan ang DILG nga ang mga makalapas sa direktiba mag-atubang og administratibo ug/o kriminal nga silot ubos sa mga hingtungdan nga balaod, lagda ug regulasyon.

Epektibo dayon ang maong kamanduan sa DILG. (ECB/PIA7-Bohol)