Pangayoa ang CR-encumbered

Kon ang sakyanan inutang pa

TAGBILARAN CITY, Bohol (PIA)—Bisan kon ang ang motor gi-utang, kinahanglan gihapon nga may kuptan nga kopya sa Certificate of Registration ang tag-iya sa sakyanan, kini maoy gipatin-aw ni Bohol LTO Registrar ug Supervising Transportation Regulatory Officer Yvonne C. Auza.

Kini nga pagpatin-aw, gibutyag ni Auza atul sa gihimong press conference nga giapilan sa mga tinugyanan sa Rgeional Office sa Land Transportation Office ug ni Gobernador Erico Aristotle Aumentado, didto sa SP Session Hall, Agosto 11.

Didto sa Press Conference, gipalanog ni Gob Aumentado ang hangyo nga hatagan una ang mga Bol-anon og usa ka buwan nga makaproseso sa mga rekisitos sa lisensya, rehistro sa sakyanan, mga accessories sa sakyanan ug mga plaka, aron dili madakpan sa LTO.

Segun sa mga nadakpan, wala silay ikapakita nga CR tungod kay wala kini ihatag kanila sa ilang gipalitan nga tindahan.

Apan, matud ni Auza, sa sitwasyon nga ang sakyanan gi-utang, responsibilidad sa giutangan nga ihatag sa nakapalit ang kopya sa CR nga may tatak nga encumbered (CRE)

Ang CRE nagpamatuod nga ang sakyanan wala pa makopleto og bayad, ug kini nagtug-an sa LTO nga ang CR niini, mahimo lamang nga walay tatak kon mahuman na kini og bayad ug ihatag na sa gipalitan ang orihinal nga kopya sa CR.

Dugang ni Auza nga sanglit kini kinahanglan nga ipasa sa namaligya ngadto sa LTO aron makagawas ang CRE ug marehistro sa Register of Deeds, kini kasagaran nga gilikayan sa mga dealership sa sakyanan, kay dugang kini nga ilang bayranan.

Tungod niini, kay mandato man sa LTO nga tan-awon ang Official Receipt (OR) ug CR sa sakyanan kon may checkpoint, dayag na lang nga kinahanglan sa nakapalit nga maningil sa dealership sa copya sa CRE, aron makalusot sa dakop.

Nunot niini, alang sa mga nakapalit og sakyanan nga walay gihuptan nga CRE, kinahanglang kuhaon kini nga dokumento gikan sa napalitan, kay sila lamang usab ang gitugotan nga moproseso niini sa LTO.

Ang pagmaneho sa sakyanan nga wala marehistro o ang pagmaneho apan walay gihuptan nga CR sa sakyanan mahimong makamulta og gikan sa P1,000 ngadto sa P10 mil. (PIABohol)

CR ENCUMBERED. ALang sa mga nakapalit og motor apan wala hatagi sa CR niini, kinahanglang makakuha sa CE Encumbered aron maoy huptan ug ipakita sa LTO kon may checkpoint. Ang kapakyas sa pagpakita sa CR, usa ka salaud sa Traffic Code ug maoy kina-ingnan sa multa. Kini gipasabut ni LTO Bohol Registrar Yvonee Auza, kinsa kauban ni LTO Operations Division Chief Aden Belza ug LTO RD Glen Galacio. (PIABohol)