Bohol napiling Best Tourism Destination

sa labing unang PHL Tourism Awards

TAGBILARAN CITY, Bohol (PIA)--Ang lalawigan sa Bohol gipasidunggan sa "Philippine Tourism Excellence Award for Tourism Destination Province for 2025-2027" sa inaugural Philippine Tourism Awards.

Sa ngalan ni Gobernador Erico Aristotle Aumentado, kinsa nangulo sa Provincial Tourism Council (PTC), gidawat ni Co-Chair Atty. Lucas Nunag ang pasidungog niadtong Lunes, Setyembre 8, sa Okada Manila, syudad sa Parañaque.

Kini nagpasiugda sa malungtarong kabilin sa Bohol isip usa ka pioneer ug lig-on nga destinasyon sa turismo sukad sa tuig 1970s.


Ang Probinsya sa Bohol napili usab nga finalist alang sa Eco-Tourism Destination award.

Giila usab ang ubang mga finalist gikan sa Bohol, lakip ang Loboc isip finalist sa Best Tourism Destination (Municipality) ug Panglao isip finalist sa Best Dive Destination.

Sa samang okasyon, gipasidunngan usab ang presidente sa Bohol Alliance of Travel and Tour Operators (BATTO) nga si Lourdes Sultan isip Tourism Pillar Awardee alang sa 2025. Si Sultan gipasidunggan isip usa ka dugay na ug lig-on nga operator sa travel and tours industry sa Bohol.

Sa post sa iyang opisyal nga Facebook page, si Gob. Aumentado nipadayag sa iyang pasalamat sa Department of Tourism (DOT) sa pag-ila sa Probinsiya sa Bohol ug sa mga stakeholders sa turismo.

“Naghatag kini og dugang inspirasyon sa atong Kagamhanang Probinsyal nga mas pakusgan pa ang mga programa ug proyekto nga nagtanyag sa kalidad nga serbisyo ngadto sa atong mga langyaw ug lokal nga mga turista, ingun nga ang Bohol nailhan isip usa ka UNESCO Global Geopark,” matud pa ni Aumentado.

Ang DOT Philippine Tourism Awards (PTA) gilantaw isip usa ka periodic national recognition program aron pagpasidungog sa excellence sa tourism value chain.

Ang inaugural awards miila sa pribado ug publikong sektor nga mga magdudula sa turismo, uban sa mga mananaog nga gipili gikan sa 102 ka mga finalist nga gipakunhod gikan sa 353 ka mga aplikante.

Ang mga kategorya naglakip sa Hotel, Resorts, Tourist Transport Operators, Tour Operators, MICE Venues, Community Tour Guides, ug Tourism Journalists. (ECB/PIA7-Bohol)

Gidawat ni Atty. Lucas Nunag, co-chair sa Provincial Tourism Council (PTC), ang pasidungog sa Bohol isip "Philippine Tourism Excellence Award for Tourism Destination Province for 2025-2027" atol sa labing unang Philippine Tourism Award niadtong Lunes, Setyembre 8, sa Okada Manila, syudad sa Parañaque. (DOT photo)