Siyentipikong pagpasanay sa tanum

sa bag-ong plant tissue culture lab

TAGBILARAN CITY, Bohol (PIA)—Medyo may kalangan kon magpasaha ug magpaliwat sa usa ka klase nga tanum, bisan pa nga dali na ang grafting, apan, unsa bay kasegurohan nga ang liwat sa gikuhaan nga tanum, makadala sa tanang kinaiya sa gigikanan?

Niining mga pangutana, ug alang sa pagtubag sa panginahanglan nga mapabilin ang maayong kina-iya sa gigikanan nga tanum, ilabi na sa mas dakung suliran sa pagpadaghan sa pagkaon alang sa seguridad sa mga katawhan, gibuksan na sa lalawigan sa Bohol ang P5 milyones nga Plant Tissue Culture Laboratory, (PTCL) sa pagpakig-alayon sa Bohol Island State University College of Agriculture and Natural Sciences.

Usa ka laboratory diin gamiton didto ang siyensya sa pagpasanay sa mga produkto nga mas labing gikinahanglan alang sa mga industriya, ang PTCL mogamit sa plant tissue gikan sa usa ka maayo og kalidad nga tanum, aron didto pasanayon sa sulod sa laboratory.

Kini aron pagseguro nga ang tanan nga maayong kinaiya sa mother plant, makuha ug mas mapadaghan ang pagpasanay sa maayong liwat.

Matud ni Gob Erico Aristotle Aumentado, kauban sa Department of Agriculture, unahon ang pagpasanay sa mga maayong klase sa ubi, kinampay, patatas, strawberry, saging, orchids, ohong ug mga buwak pangdekorasyon, kay kini daku og ikatabang sa paghulip sa dakung panginahanglan sa Bohol.

Dugang sa gobernador, ang pagningkamot sa Bohol nga mapa-asdang ang kasegurohan sa pagkaon, makatabang usab sa mga mag-uuma nga mokita og mas daghan samtang makatampo sa kinatibuk-an nga tumong nga mapatunhay ang kalikopan sa Bohol subay sa pag-amping sa labing una nga geopark sa Pilipinas. (PIAbohol)

UBI NGA DILI GIKAN SA GUHA? Human gilagdaan nila Gob Erico Aristotle Aumentado ang MOA sa katukoran sa Plant Tissue Culture Laboratory kauban sa BISU Bilar, mahimo na nga magpasanay sa ubi ug uban pang high value crops pinaagi sa tissue niini, aron segurado na nga mapaliwat ang kinatibuk-ang kinaiya sa gigikanan nga tanum. (PIABohol/PLGU)