DOLE nagdala sa kampanya batok

Child labor, abuse didto sa Mabini

MABINI Bohol (PIA)—Gidala sa Department of Labor and Employment (DOLE) uban sa Regional Council Against Child Labor ang Information ug Service Caravan kabahin sa Pagpugong sa cHild Labor ug pagpapas na niini, didto sa gibanabana nga 100 ka mga kabataan ug mga ginikanan sa Mabini, Septembre 10, 2025.

Gitumong aron pangunahan ang mga kalihukan sa pagpakayab sa kahibalo ug pag-aghat sa hiniusang lihok aron batukan ang child labor ug pagpamaayo sa kahimtang sa mga kabataan isip mga paglaum sa nasud, ang Information ug Service Caravan nagtutok sa pagpakatap sa kasayuran kabahin sa Republic Act No. 9231, nga na-amendar usab sa Republic Act No. 7610 ug sa Labor Code sa nasud.

Didto, gihimo usab ang pagpasabut sa mga kabataan ug ilang mga ginikanan sa Online Sexual Abuse ug Exploitation of Children (OSAEC) ug anti-Child Sexual Abuse ug Exploitation Materials (CSAEM), pinaagi ni Eunice Naomi Calamba, social worker.

Sa laing bahin, si Dr. Ivy Padernal Unajan, mipasabut usab sa katawhan didto sa Mabini gymnasium kabahin sa Mental Health, Adolescence Sexuality ug Reproductive Health, sa iyang kapasidad isip Municipal Health officer sa lungsod.

Kining tanan aron ikapasabut ang mga kasamtangan nga mga lakang sa kagamhanan sa pagpanalipod sa mga kabataan gikan sa abuso nga pisikal ug sekswal lakip na eng emosyonal nga pagpanamastamas.

Sa kalihukan nga gisalmotan usab sa mga ahensya nga nagtanyag sa libre nga mga nag-unang serbisyo ngadto sa kabataan ug mga ginikanan, naghimo usab og service caravan.

Ang DENR nangrehistro sa mga chainsaw ug nangproseso sa transport permits sa mga kahot nga giputol, ang SSS nanghatag og kasayuran kabahin sa membership, loans ug mga serbisyo, samtang ang GSIS ug PAG-IBIG fund didto usab aron ikapasabut ang mga pautang sa goberno.

Ang PCG nangrehistro sa mga Bangka sa safety, security ug environment numbering, ang TESDA nagtanyag sa libreng bansay pagluto og cupcakes, samtang ang MARINA nanawat sa boat registration ug renewal sa mga lisensya sa boat captain.

Didto usab ang DA nga nanghatag og mga liso igtatanum ug mga basakon sa pagpananum, ang PSA nangrehistro alang sa PhilID, ang DOH nanghatag libre nga bloos sugar screening, BP ug mga tambal samtang ang PNP, DepED, DILG, PIA nangtanyag usab s ailing mga nag-unang serbisyo ngadto sa mga kabatan ug ginikanan.

Nanumpa usab ang mga kabataan, ginikanan, mga ahensya sa kagamhanan ug mga tigsuporta sa ilang kasibut ug walay puas nga paningkamot batokan ang child labor. (PIABohol)

SAYAW BATANG MALAYA. Sa Tema nga Batang Malaya: Child-labor free Philippines, nahiusa ang mga kabataan, ginikanan ug mga ahensya sa kagamhanan didto sa Mabini, para sa kampanya pagluwas sa kabataan sa abuso pisikal, sekswal ug emosyonal alang sa mas lig-on nga nasud. (PIABohol)