DILG nanghina-ut nga buhi-on

Permi ang P5M Halfway House

TAGBILARAN CITY, Bohol (PIA)— Nanghinaut ang Department of Interior and Local Government (DILG) nga motunhay ang tukoron unya nga Half-way House dinhi sa Bohol aron nga pwede kapahuwayan sa mga kanhi rebelde nga mingtahan na sa sabakan sa balaod ug nagpaabut sa pagkapapas sa ilang mga salaud o pagkadawat sa tabang aron mahibalik og puyo tipo sa katilingban.

Didto sa Ceremonial Hall sa Kapitolyo, gipadayag ni DILG Regional Director Leocadio Trovela ang iyang pangandoy nga himoong buhi ang facility sa half-way house pinaagi sa pagpahiluna s amga bansaybansay aron makatabang sa mga kanhi rebelde sa mas sayon nila nga paghibalik sa katilingban.

Kini usab samtang gilagdaan nila Gobernador Erico Aristotle Aumentado, sa katungod sa Bohol ug ni DILG Regional Director Leocadio Trovela ang kasabutan sa P5 milyones nga pasilidad nga ipabarug sa pagpa-asdang sa mga tumong sa Ending Local Communist armed Conflict (ELCAC).

Matud ni RD Trovela, ang pasilidad unya, maoy ikaduha nga gitukod sa Central Visayas, apan karon kay nitipo na ang Negros Oriental sa lain nga rehiyon, dinhi sa Bohol na lamang ang may kapahulayan ug sak-anan sa mga nangsurrender nga mga kanhi rebelde nga nangandoy makabalik sa kinabuhing malinawon.

Ang Halfway house tukoron sa luna nga iya sa kagamhanang probinsyal samtang gamiton ang dugay na nga napahat nga pundo gikan sa DILG sa pagpabarug niini.

Daghan sa mga mingtahan nga mga kanhi rebelde ang dili na maka-uli sa ilaha tungod sa kahadlok nga dakponug patubagon sa salaud nga nahimo samtang didto sa kalihukan.

Daghan usab ang nahadlok nga balikon sa ilang ga kauban kanhi ug pahilumon na sa hangtud, samtang nangsurrender na.

Hinuon, sa mga kanhi rebelde nga nakafile na og aplikasyon sa amnestiya, mahimo na nila mahuptan ang uban nga safty ug immunity guranatees sa balaod, ug niini, dili na sila dakpon samtang wala pay resolusyon ang giaplayan nga amnestiya. (PIAbohol)

UNTA MAHIMUSLAN. Kini maoy gipadangat ni DILG Regional Director Leocadio Trovela human gilagdaan sa DILG ang pagpundo sa P5M nga Halfway House alang sa mga kanhi rebelde nga magproseso sa ilang mga documento sa paghibalik niini tipo sa katilingan. (PIABohol)