DSWD nipahimangno sa publiko batok sa 'scammer'

nga magpakaaron-ingnon nga si Sec. Rex Gatchalian

TAGBILARAN CITY, Bohol (PIA)--Gipahimangnoan sa Department of Social Welfare and Development (DSWD) ang publiko kalabot sa usa ka “scammer” nga giingong naggamit sa ngalan sa kalihim sa ahensya nga si Sec. Rex Gatchalian.

Gipaambit sa DSWD sa ilang Facebook page niadtong Setyembre 3, ang usa ka pahibalo sa publiko, nga naghangyo kanila nga mag-amping aron dili mabiktima sa mga mangingilad.

Matud pa nga ang scammer naggamit sa pangalan nga Rex Santos Flores ug naka-biktima na og usa pinaagi sa Facebook ug cash transactions nga niresulta sa pagkawala sa kantidad nga ₱11,000.00.

Ang ahensya nipagawas usab og pahinumdom nga ang DSWD dili gyud mangayo og salapi bugti sa bisan unsang tabang.

Ila usab nga gipahinumdoman nga kung makadawat og kadudahang mensahe, mahimong i-report kini sa ilang mga hotline numbers: Globe: 0917-110-5686 / 0917-827-2543; Smart/Sun - 0919-911-6200.

Mahimo usab nga magpadala og mensahe sa opisyal nga DSWD Facebook page (@dswdserves) alang sa pagkumpirma sa impormasyon kung kini tinuod o dili. (ECB/PIA7-Bohol)

Nipahinumdom ang DSWD nga dili gyud mangayo og salapi ang ahensya bugti sa bisan unsang tabang. (DSWD)