YAKAP caravan sa Bohol nga magpalambo sa mas himsog

nga mga komunidad sa eskwelahan, gibisita ni PBBM

TAGBILARAN CITY, Bohol (PIA)--Gipangunahan mismo ni Presidente Ferdinand R. Marcos Jr. ang paglusad sa Yaman ng Kalusugan Program (YAKAP) caravan sa Philippine Health Insurance Corporation (PhilHealth) sa lungsod sa Calape niadtong Biyernes, Setyembre 5.

Kini nga kalihokan nagpasiugda sa pasalig sa gobyerno sa pagpabiling himsog ug suportado pag-ayo ang mga komunidad sa eskwelahan.

Ang programa sa YAKAP nagtumong sa pagpalig-on sa nag-unang pag-atiman pinaagi sa streamlined nga mga serbisyo sa grassroots level.

Ang mga benepisyaryo, nga gilangkoban sa dul-an sa 200 ka mga ginikanan ug mga estudyante, nakadawat og libreng medikal nga konsultasyon, tambal, ug serbisyo sa PhilHealth sama sa registration, ID printing, ug member data updates.

Ang medical caravan hiniusang gipahigayon sa Calape Rural Health Unit ug sa Calape Mother and Child Hospital. Nagsilbi kini nga one-stop shop alang sa serbisyo sa PhilHealth, nga nagsilbi sa mga ginikanan ug mga estudyante nga miapil sa kalihokan.

Human gi-inagurahan ang Calunasan Small Reservoir Irrigation Project (SRIP), si Presidente Marcos mibisita sa duol nga Mandaug Elementary School diin iyang gipangunahan ang pag-apod-apod sa 118 ka mga school bags ngadto sa Grade 1 ug 2 nga mga estudyante ug duha ka smart board television.

Kauban sa Presidente sila si Department of Education (DepEd) Kalihim Sonny Angara ug PhilHealth Acting President and CEO Edwin Mercado.

Niadtong Hulyo ning tuiga, opisyal nga gilusad ni Presidente Marcos ang YAKAP, nga nagpasiugda sa usa ka makapausab nga paningkamot sa pagtukod og mas lig-on ug mas himsog nga nasud. Ang maong programa usa ka gipalambo ug gipalapdan nga bersyon sa miaging Konsulta (Konsultasyong Sulit at Tama), nga gilusad sa PhilHealth niadtong 2021. (ECB/PIA7-Bohol)

Nakighimamat si Presidente Ferdinand R. Marcos Jr. sa usa ka benepisyaryong inahan ug anak niini atol sa YAKAP caravan nga gipahigayon sa PhilHealth sa lungsod sa Calape niadtong Biyernes, Setyembre 5. (PCO)