Hearing sa paggamit sa peke

nga PhilID, himoon sa Sugbo

TAGBILARAN CITY, Bohol (PIA)—Dunggon sa usa ka korte sa Sugbo ang labing una nga kaso nga gisang-at sa Philippine Statistics Authority (PSA) batok sa usa ka tawo nga naghupot apan sa dili otorisado nga Philippine ID karong Septembre 23, didto Municipal Trial Court in Cities, Branch 01 , Cebu City.

Paglapas sa Section 19, par. 3, sub-par (d) sa Republic Act No. 11055, o ang "Philippine Identification System Act" ang gipasang-at nga kaso.

Sa kasayuran nga gipagawas sa PSA, ang probisyon nga gitumbok, kabahin sa paggamit sa PhillD o [National ID]/ o ang PhilSys Number, o ang walay pagtugot nga paghupot sa PhilID nga walay igo nga rason nganong siya ang naghupot sa dili iyahang ID, o naghupot sa peke, gipeke o gi-usab nga mga datus sa PhilID.

Isip implementing agency sa National ID, ang PSA nanumpa sa pagpakatap sa kasaligan ug katuohan nga national ID system, matud ni Legal Service Director Atty Eliezer Ambatali.

Nunot niini, ang bisan unsa nga mga lakang nga pagpugos sa pag-abuso ug dili pagrespoto sa National ID, himoon sa PSA, dala na usab sa paghatag og seryoso nga pagtamud sa nasudnong ID.

Nunot usab niini, gipahinumdom ni PSA Bohol Chief Statistical Specialist Jessamyne Anne Alcazaren nga hangtud nga ikapadayon sa kagamhanan ang pagpatik sa mga ID cards nga wala pa marelease, gidawat gihapon ang electronic ID nga gilaminate nga printed copy sa digital file sa isa ka tawo nga nakuha na sa PSA.

Gani, dugang ni Alcazaren nga wala na kinahanglana pang iprinta ang digital copy sa ID kay subay sa balaod, mahimo na kini nga maoy ipresentar isip hiniusang pagmatuod sa usa ka tawo.

Gidili man gani sa PSA ang pagdownload sa digital ID ug ipaprinta sa plastic cards. (PIABohol)

ILEGAL ANG PAGPRINTA SA PLASTIK. Ang PhilID nga madownload, pwede nga iprinta sa papel ug ipalaminate apan dili mahimo nga iprinta sa plastic tungod sa sensitibo nga security features sa ID nga ipalaman sa legal nga printer niini. (PIAbohol)