Mga serbisyo sa gobyerno gidala sa isla sa

Batasan sa ‘Barangayan sa Bagong Pilipinas’

TAGBILARAN CITY, Bohol (PIA)--Ang Philippine Information Agency (PIA) sa Bohol nidala sa 'Barangayan sa Bagong Pilipinas' mini service caravan sa isla sa Batasan, lungsod sa Tubigon niadtong Agosto. 27.

Ang kalihokan nagtugot sa nagkadaiyang ahensya sa gobyerno nga makaduol ug direkta nga makig-uban sa komunidad aron matubag ang ilang mga isyu ug mapalig-on ang kalig-on sa komunidad. Gipakita usab niini ang kamahinungdanon sa panaghiusa ug partnership tali sa mga ahensya sa gobyerno ug lokal nga organisasyon aron mas epektibo nga mahatod ang mga serbisyo ngadto sa katawhan.

Sa pakigtambayayong sa Panggamhanan sa lalawigan sa Bohol, sa buhatan ni First District Representative John Geesnell Yap, local government unit sa Tubigon, mga ahensya sa nasudnong gobyerno ug pribadong institusyon, ang grupo nidala sa mga serbisyo sa gobyerno ngadto sa islang barangay.

Ang mga serbisyo nga napahimoslan sa mga residente sa isla sa Batasan naglakip sa Social Security System (SSS) membership ug data updating; YAKAP (Yaman ng Kalusugan Program) ug enhanced services sa PhilHealth; Philippine Statistics Authority (PSA) PhilID registration; libreng tupi sa 47th Infantry Battalion (47IB) sa Philippine Army; safety, security ug boat numbering sa Philippine Coast Guard (PCG); Bureau of Fisheries and Aquatic Resources (BFAR) Fisherfolk Registration System ug pang-apod-apod og IEC materials sa panginabuhian ug value added nga mga produkto gikan sa pangisda; pagpanghatag og adbokasiya nga materyales ug mga liso alang sa containerized gardening sa Agricultural Training Institute (ATI) Central Visayas; ug sea transport assistance sa 21st Special Forces ‘Riverine’ Company.

Ang Office of the Governor’s Medical Outreach Unit miduyog usab sa Barangayan nga nagdala og libreng mga tambal isip dugang serbisyo nga komplemento sa Provincial Health Office (PHO) nga libreng medical ug dental check-up ug pag-ibot sa ngipon.

Samtang mikabat sa 270 ka sako (tag 10 ka kilo) nga bugas ug 270 ka grocery packs ang gipang-apod-apod sa mga pamilya sa isla nga barangay gikan sa Office of the Provincial Social Welfare and Development Office (OPSWDO), samtang si Cong Yap nihatag usab og 200 ka food packs.

Sa laing bahin, ang National Housing Authority (NHA) pinaagi sa ilang provincial head Genesis Manalili nipaambit ngadto sa mga residente sa programa sa pabalay sa gobyerno sa pagbutang og 80 ka row house sa unang tranche ug laing 75 ka balay sa sunod nga tranche sa barangay Genonocan, diin ang mga apektadong katawhan sa mga residente sa isla mahimong maka-avail.

Ang isla sa Batasan nailhan nga usa sa mga “sinking island communities” nga pirmi makasinati og taas nga balod ug hulga sa kinabuhi ug kabtangan, labi na karon tungod sa Habagat ug padayon nga epekto sa climate change. (ECB/PIA7-Bohol)

Ang mga lumulupyo sa isla sa Batasan sa lungsod sa Tubigon nakapahimulos sa medikal nga konsultasyon ug uban pang serbisyo sa gobyerno, nga halos dili nila makuha tungod sa ilang distansya gikan sa labing duol nga pasilidad sa serbisyo sa mainland nga lungsod sa Tubigon. Gawas niini nakadawat sab sila og libreng tambal ug mga vitamins atol sa ‘Barangayan sa Bagong Pilipinas’ mini service caravan nga gipahigayon sa Batasan covered court niadtong Agosto 27, 2025. (ECB/PIA7-Bohol)