Mga trabahante sa pampublikong panakyanan

mahimo nang makapalit sa P20/kilo nga bugas

TAGBILARAN CITY, Bohol (PIA)--Gimanduan ni Presidente Ferdinand R. Marcos Jr. ang mga hingtungdan nga ahensya sa gobyerno nga palapdan ang pagkab-ot sa programa sa administrasyon nga Benteng Bigas, Meron Na, nga mag-apil na karon sa 57,000 ka mga trabahante sa publiko nga transportasyon sa tibuok nasod, ug sa dili madugay maapil na usab ang mga magtutudlo sa publiko nga eskwelahan ug non-teaching staff.

“Pwede nang bumili ng mura at dekalidad na bigas ang mga tsuper sa ilalim ng Benteng Bigas Meron Na program,” pahibalo ni Presidential Communications Office (PCO) Undersecretary ug Palace Press Officer Claire Castro sa press briefing sa Malacañang adlaw’ng Miyerkoles.

“Sunod namang magiging parte ng programa ang public school teachers at non-teaching personnel. Ito’y ayon sa utos ni Pangulong Ferdinand R. Marcos Jr. na gawing mas accessible ang abot-kayang bigas para sa mga Pilipino,” dugang pahibalo ni Castro.

Ang Department of Agriculture (DA) nilusad sa Benteng Bigas, Meron Na nga programa—ang flagship affordable rice initiative ni Presidente Marcos—aron makaabot sa kapin sa 57,000 ka bus, jeepney, ug tricycle drivers ug operators sa lima ka dagkong syudad.

Ang DA nagkanayon nga ang unang rollouts nahitabo sa Quezon City, Navotas City, Angeles City, Pampanga, Cebu City, ug Tagum City.

Ang sektor sa publikong transportasyon miduyog na karon sa han-ay sa mga makabenepisyo sa P20 matag kilo nga bugas, kabahin sa dakong paningkamot ni Presidente Marcos sa pagpaubos sa gasto sa panginabuhi sa mga Pilipino, ilabi na sa mga huyang nga sektor.

Ubos sa programa, ang mga kwalipikadong drayber ug operator tugotan nga makapalit hangtod sa 10 ka kilo sa P20 matag kilo nga bugas matag buwan.

Matud pa ni Castro nga ang DA padayon nga nagpalapad sa programa aron maabot ang target nga 15 milyones ka panimalay o 60 milyones sa mga Pilipino.

Sa sinugdan gitumong sa mga senior citizens, solo parents, persons with disabilities, 4Ps beneficiaries, ug indigent households, ang programang Benteng Bigas Meron Na ug paspas nga gipalapdan aron masakop ang mga minimum wage earners, mag-uuma, mangingisda, ug benepisyaryo sa Walang Gutom Program sa Department of Social Welfare and Development (DWSD). (ECB/PIA7-Bohol)

Gipangunahan mismo ni Presidente Ferdinand R. Marcos Jr. uban ni Bohol Gob. Erico Aristotle Aumentado ug Department of Agriculture Kalihim Francisco Tiu Laurel Jr. ang opisyal nga paglusad sa iyang flagship food program nga “Benteng Bigas, Meron (BBM) Na!”, sa lungsod sa Bien Unido niadtong Setyembre 5, 2025. Kini nga flagship initiative ni Presidente Marcos nga gihimo sa DA usa ka mahinungdanong lakang ngadto sa paghatod sa barato nga pagkaon sa mga Pilipino. (ECB/PIA7-Bohol)