Tubigon: labing unang LHEARN

Area sa programa sa nutrisyon

TAGBILARAN CITY, Bohol (PIA)—Opisyal na nga gihimong Learning Hub alang sa Enhanced ug Revitalized Nutrition (LHEARN) ang lungsod sa Tubigon, ang labing una nga LGU sa Central Visayas nga gihimong nutrsition learning hub, diha nga gilagdaan ni Mayor Marlo Amila ug ni Dr. Parolita Mission ang Memorandum of Agreement nunot niini niadtong Biyernes, September 12.

Matud ni Dr. Mission, ang MOA naghimong pormal sa pagdawat sa lungsod nga sila motabang sa pagpaambit ngadto sa mga laing local nga kagamhanan nga buot mapamaayo sa ilang mga programa sa nutrisyon, sa ilang mga maayong bansay sa programa sa nutrisyon.

Ang pagkahimo sa Tubigon nga LHEARN site, nagsukad usab sa hataas nga maayong kasinatian sa lungsod sa pagpatuman sa ilang malampuson nga programa sa nutrisyon.

Matud ni Tubigon Municipal Nutrition Action Officer Joanna Faye Obdulia B. Reserva, kinsa registered nutritionist ug dietician usab, nasugdan nila ang gipalig-on nga programa sa nutrisyon, sa tulo na ka administratsyon: ni Mayor Luna Piezas, Mayor Marlon Amila ug Mayor William Jao, nga karon nahibalik na usab ni Amila.

Niadto nakuha nila ang Green Banner of Compliance sa tulo ka tuig, ang Consistent Regional Outstanding Winner for Nutrition sa tulo na usab ka tuig hangtud nga nakuha sa lungsod ang labing taas nga pasidungog nga ihatag sa mga kalungsuran ug LGUS sa pagpatuman sa mga programa sa nutrisyon.

Nagpadayon ang Tubigon nga nag maintain sa ilang Nutrition Honor Awards, ang labing taas nga pasidungog nga ihatag ngadto sa mga LGUs, matud ni Dr. Mission.

Didto usab atul sa pagpakighinabi sa media sa National Nutrition Council nga si Dr Mission maoy regional Nutrition Coordinator, gipamatud-an sa mga kapitan sa lima ka mga barangay sa Tubigon ang malampusong programa. (PIABohol)

TINABANGAY SA NUTRISYON. Ang Tubigon Bohol maoy unang natumbok nga lugar kat-onanan sa mga LGUS sa Central Visayas alang sa malampuson nga pagpatuman sa mga programa sa Nutrisyon human milagda ang lungsod sa LHEARN MOA kauban ni Dr Parolita Mission (naas tunga). (PIABohol)