FMA 9 student writers magtigi

mga bangga sa FishCon Month

TAGBILARAN CITY, Bohol (PIA)—Sa kasaulogan sa ika 62 nga Fish Conservation Month, pangunahan sa Bureau of Fisheries and Aquatic Resources (BFAR) ang mga kalihukan nga magpalambigit sa kabatan-onan sa pag-apil sa kampanya sa kamahinungdanon sa pagpatunhay sa kadagatan ug kahinguhaan pinaagi sa maluntarong pagdumala sa managatan.

Nunot niini, alang sa mga kabataan nga sakop sa mga kalungsuran nga nahilakip sa Fisheries and Coastal Resilience (FishCORE) ang labing una nga Student Journalist Press Conference (FJPC) diin ang mga kabataan gikan sa Grade 11 ug Grade 12 sulod sa Fisheries Management Area 9 magtigi sa pagsuwat sa features, editorial,a pagdebuho og editorial, pagkuhag hulagway ug paghimog sugilanon pinaagi niini lakip na ang pagmugna og music video.

Sa mga bangga nga adto himoon sa Panda Tea Garden Suites, Septembre 17, matud sa BFAR pinaagi ni Laila Bragat, ang information Officer sa FishCORE, ang tanan nga mga entries kinahanglang magtuki sa tumong sa FishCORE ug sa tema sa Fish Conservation Week 2025 nga “Pangisdaang Masagana: Sapat na Isda sa Bawat Pamilya.

Kahinumduman nga ang mga kalungsuran sa Bohol nga sakop sa FMA 9 mao ang Alburquerque, Anda, Baclayon, Candijay, Dauis, Dimiao, Duero, Garcia Hernandez, Guindulman, Jagna, Lila, Loay, Mabini, Panglao, Ubay, Valencia, ug President Carlos P. Garcia.

Gikan dinhi nga mga kalungsuran, ang mga kabataan nga mosalmot sa mga kompetisyon, una na nga giparehistro, human sila gipang-endorsar sa ilang nga tagsatagsa ka mga tunghaan.

Ang mga mananaog niining bagga, makadawat og mga premyo u gang posibilidad nga ang ilang mga sinuwat, gamiton sa BFAR sa pagpatuman sa kampanya sa FishCORE. (PIABohol)