PhilHealth opisyal nga milusad sa YAKAP sa Bohol

TAGBILARAN CITY, Bohol (PIA)--Opisyal nga gilusad sa Philippine Health Insurance Corporation (PhilHealth) Rehiyon VII ang enhanced primary care package nga Yaman ng Kalusugan Program (YAKAP), sa lalawigan sa Bohol, adlaw’ng Martes, Setyembre 16, 225 sa MetroCentre Hotel sa syudad sa Tagbilaran.

Sa iyang pangbukas nga mensahe, si PhilHealth Region VII Regional Vice President Marjorie A. Cabrieto mihatag og gibug-aton sa kamahinungdanon sa pulong nga YAKAP, nga nagkahulogang “gakos.” Gipasabot niini nga ang YAKAP nagsimbolo sa pag-atiman, kaluoy, ug proteksyon – nagpamatuod pag-usab sa pasalig sa PhilHealth nga masiguro nga walay Pilipino nga mabiyaan sa pag-atiman sa panglawas.

Ang YAKAP gipresentar isip gi-rebranded nga bersyon sa Konsulta Package, nga nagdala na karon og ngalan nga mas duol sa kasingkasing sa mga Pilipino. Samtang ang tumong nagpabilin nga pareho - paghatag og nag-unang preventive nga pag-atiman - ang bag-ong package nagpalapad sa iyang coverage.

Apil na niini ang cancer screening, ug gipaayo nga pag-access sa mga tambal pinaagi sa PhilHealth Guaranteed and Accessible Medications for Outpatient Treatment (GAMOT) nga programa.

Gipasiugda usab ni Cabrieto nga ubos sa programa sa GAMOT, ang mga benepisyaryo sa PhilHealth mahimo nang maka-avail og hangtod sa P20,000 nga kantidad sa mga importanteng tambal matag tuig, nga naglangkob sa kasagarang mga sakit sama sa hypertension, diabetes, asthma, chronic respiratory disease, ug uban pang impeksyon.

Samtang sa iyang mensahe, gipamatud-an ni Gobernador Erico Aristotle Aumentado ang bug-os nga suporta sa Bohol nga nag-ingon nga ang YAKAP dili lang usa ka programa sa gobyerno apan usa ka lifesaver – usa ka inisyatibo nga makatabang sa pagpanalipod sa kinabuhi sa mga tawo.

“Pinaagi sa PhilHealth YAKAP, adunay motabang kanato aron mapanalipdan ang atong kaugalingon batok sa mga sakit ug malikayan ang kabalaka nga gastuhonon sa tambal ug check-up ug laboratory,” matud pa ni Aumentado.

Atol sa maong kalihokan, gihatag sa PhilHealth Region VII ang Certificate of Accreditation ngadto sa Governor Celestino Gallares Memorial Medical Center (GCGMMC) isip usa sa GAMOT providers sa Probinsya.

Gipahigayon usab ang seremonyal nga paglagda sa manifesto ug pasalig, nga nagsimbolo sa panaghiusa sa PhilHealth, local chief executives, ug local health leaders sa pagsiguro nga ang pag-atiman sa panglawas magpabiling inklusibo ug accessible sa mga Boholano.

Nitambong ug nihatag usab og mensahe sa suporta sila Philippine Health Insurance Corporation Board Member Robert Francis F. Maronilla, Department of Health Central Visayas Center for Health Development pinaagi ni Regional Director Dr. Joshua G. Brillantes, ug Bohol Provincial Health Officer Dr. Fruserma Mary Uy.

Gitapos ni Cabrieto ang iyang mensahe sa usa ka panawagan alang sa mas lig-on nga panag-uban diin matud pa niini nga ang PhilHealh YAKAP dili lang mahitungod sa mga serbisyo sa primary care. Kini mahitungod sa pagpasalig sa matag inahan, amahan, ug anak nga sa panahon sa panginahanglan, dili sila mag-inusara - tungod kay naa ang PhilHealth aron sagupon sila. (ECB/PIA7-Bohol)

Gipangunahan nila PhilHealth Region VII Regional Vice President Marjorie A. Cabrieto ug Bohol Gob. Erico Aristotle C. Aumentado ang paglagda sa manifesto ug pasalig nga nagsimbolo sa panaghiusa sa PhilHealth, local chief executives, ug local health leaders sa pagsiguro nga ang pag-atiman sa panglawas magpabiling inklusibo ug accessible sa mga Bol-anon atol sa opisyal nga paglusad sa YAKAP sa lalawigan sa Bohol niadtong Setyembre 16, 2025, sa MetroCentre Hotel sa syudad sa Tagbilaran. (ECB/PIA7-Bohol)