PSA nipasidaan batok sa Phishing scams

nga nagtakuban isip tabang sa National ID

TAGBILARAN CITY, Bohol (PIA)--Ang Philippine Statistics Authority (PSA) subling mipahimangno sa publiko batok sa phishing scams diin ang mga scammer nagpakaaron-ingnong PSA personnel nga nagtanyag og tabang nga may kalabotan sa National ID.

Ang mga indibidwal o grupo sa likod sa maong mga scam naggamit sa mga text, tawag, email, o virtual nga mga meeting pinaagi sa mga plataporma sa video conferencing aron linglahon ang mga indibidwal sa paghatag og personal nga impormasyon ubos sa pagtabon sa tabang sa National ID sama sa pag-update sa impormasyon o paghatod sa ID. Ang mga display name sa email o mga link nga gihatag susama usab sa mga opisyal nga website o app sa mga ahensya sa gobyerno.

Sa ubang mga higayon, ang pagbisita sa mga balay gihimo diin ang mga rehistrado nga tawo gitanyagan og cash baylo sa pagkuha sa ilang National ID nga litrato.

Ubos sa Section 19 sa Republic Act 11055, ang bisan kinsang tawo nga mapamatud-an nga nagkolekta o naggamit sa personal nga datos, o nag-access sa National ID system o nagproseso sa datos o impormasyon nga walay awtoridad mahimong silotan og 6 ngadto sa 10 ka tuig nga pagkabilanggo ug multa nga P3,000,000 ngadto sa P5,000,000.

Ang kaduha sa kantidad sa pinansyal nga ganansya nga nakuha gikan sa pag-access, pagbutyag, o paggamit sa maong mga datos o impormasyon idugang usab isip silot.

Gitambagan sa PSA ang publiko nga likayan ang paghatag og personal nga impormasyon sa wala mailhi nga mga tawo, bisan unsa pa ang channel o pamaagi.

Alang sa bisan unsang pangutana balabot sa National ID, gi-awhag sa PSA ang publiko sa pag-refer o pagkontak sa mga opisyal nga channel sa PSA.

Sa pagsulat niini, ang PSA nagpagawas og daghang mga advisories nga nagpasidaan sa publiko bahin sa phishing scams.

Ang PSA nag-awhag sa bisan kinsa nga adunay impormasyon sa maong fraudulent nga kalihokan nga mo-report dayon sa PSA pinaagi sa email sa info@philsys.gov.ph, mensahe sa www.facebook.com/PSAPhilSysOfficial, o tawag sa Hotline 1388 (may bayad). Ang publiko mahimo usab nga mobisita sa labing duol nga sentro sa pagrehistro ug magreport sa gitudlo nga Opisyal sa Insidente sa Pangilad. (ECB/PIA7-Bohol)

Gipasiugda sa PSA nga ang opisyal nga email address alang sa National ID mao ang

info@philsys.gov.ph, nga adunay email handle National ID Info Center. (PSA)