Social marketing arm sa DSWD-7 nipahigayon og

info sharing sa mga miyembro sa AUDIO-Bohol

TAGBILARAN CITY, Bohol (PIA)--Aron mahatagan ang publiko sa tukma ug kasaligan nga kasayoran, ang Social Marketing Unit sa Department of Social Welfare and Development (DSWD) Field Office 7–Central Visayas ni-host sa binuwan nga tigom sa mga miyembro sa Association of United Developmental Information Officers (AUDIO)-Bohol niadtong Setyembre 5, 2025 nga gipahigayon sa syudad sa Tagbilaran.

Ang kalihokan kabahin sa Tamang Tulong sa Tamang sa Impormasyon (3TI) nga kampanya sa buhatan nga nagsiguro sa tukma nga impormasyon padulong sa saktong interbensyon.

Atol sa forum, ang mga resource persons sa DSWD mipresentar sa ilang dagkong mga programa nga naglakip sa Pantawid Pamilyang Pilipino Program (4Ps), Sustainable Livelihood Program (SLP), Assistance to Individuals in Crisis Situations (AICS), ug ang Ayuda para sa Kapos ang Kita Program (AKAP).

Gipasiugda usab sa ahensya ang yawe niining adbokasiya batok sa Violence Against Women and their Children (VAWC), Online Sexual Abuse and Exploitation of Children (OSAEC), ug Trafficking in Persons (TIP).

Si DSWD-7 Regional Director Shalaine Marie S. Lucero mi-awhag sa mga sakop sa AUDIO-Bohol sa pagserbisyo isip mga tigpasiugda sa DSWD pinaagi sa pagsangkap sa publiko sa saktong impormasyon bahin sa mga programa ug serbisyo sa departamento.

“As partners for change, we hope you can help us amplify the correct news, proper processes, and accurate guidelines of our programs. Help us make the various programs and services of DSWD easier for the people to understand (Isip partners sa pagbag-o, nanghinaut kami nga matabangan kami nga mapadako ang sakto nga balita, husto nga proseso, ug tukma nga mga panudlo sa among mga programa. Tabangi mi nga mas dali masabtan sa katawhan ang nagkalain-laing programa ug serbisyo sa DSWD),” awhag ni Lucero sa video message.

Gi-ila ni Lucero ang mga information officers isip mga kaabag sa pagbag-o—usa ka instrumento sa departamento sa pagdala ug paghatag sa hustong mensahe ug impormasyon ngadto sa publiko.

Gihatagan usab niya og gibug-aton nga kini nga inisyatiba nagtubag sa panawagan sa DSWD nga palig-onon ang pagmaneho sa impormasyon ug pagsiguro nga mahatagan sa husto ug tukma nga kasayoran ang publiko.

Atol sa forum, gitubag usab sa mga resource person ang mga pangutana sa mga partisipante.

Gipasalamatan sa mga Information officers gikan sa local government units ug national government agencies ang mga resource persons, organizers, ug ang departamento sa pagpatuman sa mga programa ug serbisyo nga tinuod nga makabenepisyo sa katawhan.

Matud pa ni AUDIO-Bohol President Doris Isabel Racho nga ang suporta sa DSWD sa mga information officers nakahatag kanila og kahigayonan nga magkauban, magbinayloay og mga ideya, ug magpalig-on sa gipaambit nga pasalig sa komunikasyon sa kalamboan ug serbisyo publiko.

Samtang iyang gipaambit ang iyang panghinaot sa mga kaubanang information officers nga kanunay’ng dalhon ang diwa sa pagtinabangay ug pagserbisyo sa matag buluhaton alang sa komunidad. Kauban sa mga kasosyo sa pagpauswag ug sa dili matarug nga suporta, masaligon kini nga ang AUDIO-Bohol magpadayon sa paghimo sa usa ka makahuluganon nga epekto. (ECB/PIA7-Bohol)

Ang mga information officers, organizers, ug resource persons nagtigom sa DSWD Field Office 7 Information Officer’s Forum uban sa AUDIO–Bohol niadtong Setyembre 5, 2025, sa Kew Hotel sa syudad sa Tagbilaran. (ECB/PIA7-Bohol)