Bohol nagpadala og hinabang, medikal ug

rescue teams sa Sugbo nga naigo sa linog

TAGBILARAN CITY, Bohol (PIA)--Ang kagamhanang probinsiyal sa Bohol nagpadala og hinabang sa Sugbo nunot sa makamatay nga 6.9-magnitude nga linog nga miigo sa lalawigan niadtong Martes sa gabii.

Gipahibalo ni Gob. Erico Aristotle Aumentado niadtong Oktubre 1 nga ang probinsiya nagpadala og P5 milyones nga hinabang pinansyal, uban sa grupo sa 16 ka medical ug rescue personnel, duha ka ambulansya, ug rescue vehicle aron pagtabang sa mga dapit nga naigo sa linog sa Sugbo.

Ang team mibiya sa Bohol niadtong Oktubre 1 sa ala 1:30 sa pales.

Samtang gipahibalo usab ni Tagbilaran City Mayor Jane Yap nga ang dakbayan nagpadala og hinabang sa naigo sa linog sa Sugbo, nagpakatap og bag-ong rescue vehicle ug ambulansya uban sa mga nabansay nga rescuers.

Nagdala ang grupo og extraction tools, body bags, victim finders, spreaders/cutters, tower lights, lifting bags, mga pisi, generators, gabas, tubig nga mainom, ug mga pagkaon nga andam na nga kan-on alang sa mga biktima sa linog.

Samtang ang Sugbo naka-angkon og grabe nga kadaot sa linog, ang Bohol nakaangkon og gamay lamang nga kadaot.

Pipila ka mga school building sa mga lungsod sa Sevilla, Balilihan, Ubay, Bien Unido, ug Guindulman nitaho og ginagmay nga mga liki nga gi-isip nga dili delikado.

Ang mga network sa dalan sa tibuok lalawigan nagpabiling maagian, gawas sa duha ka taytayan sa lungsod sa Dauis diin ang Castel Bridge bukas lamang sa gaan nga mga sakyanan, samtang ang Borja Bridge naglihok sa usa ka lane nga basehan tungod sa mga kabalaka sa istruktura.

Nagpabilin usab nga fully operational ang mga ospital sa tibuok probinsya.

Sa Gov. Celestino Gallares Medical Center (GCGMC) sa syudad sa Tagbilaran, 87 ka mga pasyente ang gipabakwit kadali niadtong Martes sa gabii isip panagana, apan gibalik sila sa sulod human gisusi sa mga engineer ang building sa ospital nga luwas na.

Ang pagtay-og, nga niigo alas 9:59 sa gabii, hinungdan sa temporaryo nga pagkawala sa kuryente sa tibuok Bohol ug nakapahadlok sa mga residente sa kadalanan. (ECB/PIA7-Bohol)

EMERGENCY MEETING. Gipangunahan ni Gob. Erico Aristotle Aumentado ang emergency Bohol PDRRMO meeting uban sa mga nag-unang ahensya sa nasudnong kagamhanan sa panglawas, katalagman ug hinabang aron masusi ang kahimtang sa lalawigan human sa 6.9 magnitude nga linog nga miigo sa Sugbo nga nakaapekto usab sa Bohol niadtong Setyembre 30 sa gabii. (PIA-Bohol)