SEC mingpahinumdom

pagtamud sa GIS, AFS

TAGBILARAN CITY, Bohol, (PIA)—Mingpahinumdom ang Securities and Exchange Commission (SEC) nagdto sa mga sakop ug rehistradong mga kompanya ug korporasyon sa pagtamud sa duha ka mga obligasyon nga kinahanglang ikaduso aron dili magkasuliran ang kompanya.

Didto sa Kapihan sa PIA, gipadayag ni SEC Information Officer Dione Drew Diano nga dili na magkinahanglan pa ang SEC sa renewal sa mga sakop kay kini nasukip na man sa mga online nga mga pamaagi nga ila na nga gibuksan alang sa mga korporasyon ug kompanya.

Hinuon, gikinahanglan pa gihapon nga iduso ang General Information Sheet (GIS) sulod sa 30 ka adlaw mahuman petsa sa tinuig nga stockholders' o members' meeting alang sa stock ug non-stock corporations, o sa anibersaryo sa pagkadawat sa lisensya, kon kini langyaw nga corporation.

Giaghat usab ni Diano ang mga korporasyon sa paggamit sa SEC eFAST portal aron iduso ang ilang GIS, subay usab sa natumbok nga deadlines

Ikaduha, gikinahanglan usab ang Audited Financial Statement (AFS) nga ang tagal o deadline magdepende sa fiscal year-end sa kompanya, matud sa Information Officer.

Sa mga korporasyon kang kinsa nga fiscal year mahuman sa Desembre 31, ang deadline nakabase sa tigi-tigi nga schedule sa coding, ug kini magsugod sa Mayo ngadto sa Julyo depende sa katapusang numero sa registration number.

Ug alang niadtong may mga fiscal year nga mahuman sa lahi-lahi nga petsa, ang deadline kinalanglang sulod sa 120 ka adlaw human sa fiscal year-end.

Ang pagkapakyas sa pagduso sa duha ka mga gikinahanglang dokumento ngadto sa SEC moresulta sa mga silot, pahinumdum ni Diano. (PIABohol)

AYAW PAKYASA. Duha lamang ka reportorial requirements ang tamdan aron dili masilotan, pahinumdom ni SEC information Officer Dione Drew Diano didto sa Kapihan sa PIA. (PIAbohol)