DA-7 padayon ang pag-apod apod sa libreng

abono bisan nakasinati og pagtay-og ang Bohol

TAGBILARAN CITY, Bohol (PIA)--Nagpadayon gihapon ang pag-apod-apod sa mga libreng abono alang sa mga mag-uuma sa humay sa lalawigan sa Bohol gikan Oktubre 1 hangtod 3, bisan paman nakasinati og linog ang lalawigan niadtong Setyembre 30, 2025.

Ang mga kawani sa Department of Agriculture-Central Visayas (DA7) nga naa sa Bohol nadestino, mipadayon sa ilang tahas sa pagpanghatag sa libreng abono ngadto sa mga lungsod sa Inabanga, Carmen ug uban pang mga lungsod, pinaagi sa Fertilizer Discount Vouchers (FDV) ubos sa Rice Program.

Sa lungsod sa Inabanga diin ang pag-apod-apod gihimo sa Municipal Gymnasium, may 749 ka mga mag-uuma sa humay ang nakadawat sa libreng abono, diin nagkantidad kini og P1,602,351.66 nga balor sa inorganic fertilizer, ug P471,279.9 sa organikong abono sama sa soil ameliorants ug fermented chicken dung.

Gikalipay ni Bernie Basas, usa ka mag-uuma gikan sa Baogo, Inabanga nga nakadawt kini sa mga libreng abono.

“Nalipay ko nga nakadawat ko og usa ka sako ug kapin nga abono. Dako na kaayo kini og tabang namo, bahala og gamay ra basta kay naa,” matud pa ni Basas.

Samtang matud pa usab ni Fructosa Historia nga taga Liloan Norte, Inabanga, nga dako niyang pasalamat sa DA sa tanang gipanghatag nga tabang alang sa iyang basakan, diin nakadawat kini og tulo ka sako ug upat ka kilo sa inorganic fertilizer.

Sa laing bahin, nag-apod apod usab sa lungsod sa Carmen diin 2,244 ang nakabenepisyo sa P4,697,268.30 nga inorganic fertilizer ug sa P1,382,329.50 nga kantidad sa organic fertilizer.

Nagpahigayon usab ang lungsod sa Antequera og susamang aktibidad diin 283 ka mga rice farmer ang nakadawat sa inorganic fertilizer nga nagkantidad og P397,848.62, ug organikong abono nga nagbalor og P117,014.30. (ECB/PIA7-Bohol)

Bisan paman sa nasinating linog niadtong Setyembre 30, gipadayon gihapon sa Department of Agriculture-Central Visayas (DA7) ang pagpanghatag sa libreng abono ngadto sa mga mag-uuma sa humay sa lalawigan sa Bohol gikan Oktubre 1 hangtod 3, 2025. (DA-7 photo)