Dugang puhunan sa MSMEs makuha

Kon Bohol-SB Corp MOA kalagdaan

TAGBILARAN CITY, Bohol, (PIA)—Dugang pundo nga ikapahuwam unya sa mga Bol-anong may gagmay nga pamuhunan, kini kay buot sa Sangguniang Panlalawigan (SP) nga tugotan si Gobernador Erico Aristotle Aumentado nga makiglagda sa Department of Trade and Industry (DTI) Small Business Corporation (SBCorp) sa dugang pang tinabangay.

Usa ka Memorandum of Agreement (MOA) ang palagdaan sa SP sa gobernador tali sa SB Corp, aron palig-onon pa ang partnership sa Bohol ug sa credit financing corporation pinaagi sa Bohol Economic Development and Investment Promotions Office (BEDIPO).

Kini alang sa panginahanglan sa puhunan sa mga micro, small, ug medium enterprises (MSMEs), matud ni Board Member Fernando Estavilla, tsirman sa SP Trade and Industry Committee.

Ang MOA, wala ma aksyoni sa kanhi nga SP.

Ang SBCorp usa ka government financial institution nga ubos sa DTI, nga namugna ubos sa Section 13 sa Republic Act 9501, o “Magna Carta of Micro, Small, and Medium Enterprises (MSMEs)” aron maoy motabang sa mga gagmay nga mamumuhunan nga nanginahanglang puhunan, dugang ni Estavilla.

Hangtud sa Agosto 15, 2025, ang SBCORP - Visayas Group nakatanyag na ngadto sa kapin sa 3,500 ka Bol-anon nga MSMEs sa tulay ngadto sa mga programang pahuwam ug pautang nga may dali bayran ug ubos nga interes nga p[amaagi.

Mikabat na sa P 349,575,631 ang capital nga gikabubo sa SB Corp sa Bohol, segun usab sa DTI.

Sa kasabutan, ang BEDIPO na ang magpili sa mga MSMEs nga tinuod nga may panginahanglan sa puhunan ug magdugtong sa SBCorp ngadto sa mga MSMEs, aron maka-ugmad sa ilang negosyo.

Sa tumong sa SP Committee nga papirmahan na ni Aumentado ang MOA, samtang gipasalig usab sa Provincial Legal Office (PLO), nga ang kasabutan, walay probisyones nga maalkanse ang Bohol ug kini nahasubay sa balaod. (PIAbohol)

PUHUNAN PARA MAKAAMBAS. Daghang mamumuhunan nga ang kakuwang sa puhunan u gang kalisud pagpangita og kautangan, nakapugong sa ilang pag-asenso. Pinaagi sa SB Corp nga iya usab sa goberno, segurado na ang sayon nga pahuwam sa gamay nga interes aron masinati sa mga Bol-anong MSME ang pag-ugmad. (PIAbohol)