‘LAB Bohol,’ opisyal na nga

Makaproseso sa amnestiya

TAGBILARAN CITY, Bohol, (PIA)— Pormal na nga gipapanumpa ang mga sakop sa Local Amnesty Board (LAB), ang local nga buhatan dinhi sa Bohol nga nasangonan sa National Amnesty Commission (NAC) nga maoy modawat ug moproseso sa mga aplikasyon sa mga kanhi rebelde nga buot na nga mapasaylo sa ilang mga salaud political.

Ang LAB Bohol maoy ika 11 nga LAB nga natukod sa tibuok Pilipinas aron mapasayon ang pagpatahan sa mga rebelde ug mas sayun silang makakuha sa amnestiya.

Mismo si NAC chairperson Atty Leah Tanodra Armamento ang mipapanumpa nila ni LAB chairperson Goberandor Erico Aristotle Aumentado, Alternate Chair Romeo Teruel, Prosecutor Eric Ucat sa Department of Justice ug Asst Prosecutor Ingemar Macarine isip alternate sa DOJ.

Sakop usab sa LAB si Philippine National Police Regional Director Brig General Redrico Maranan ug si Provincial Director Patricio Degay isip alternate, Armed Forces of the Philippines Deputy Brigade Commander General Richard Rabaca ug si

Ang LAB usa ka buhatan nga gitugyanan sa NAC nga maoy modawat ug moproseso sa mga papeles sa mga kanhi rebelde nga mingtahan na ug buot na nga manginabuhi nga malinawon pinaagi sa pagkuha sa amnestiya.

Ang Amnestiya usa ka programa nga gitukas sa kagamhanan aron kahatagan sa higayon ang mga kanhi rebelde nga makatipo og balik sa katilingban nga papas na ang ilang mga sala, dala sa ilang mga salaud samtang nagpasakop sa kalihukang walhon.

Ang matag rebelde nga motahan sa iyang kaugalingon, sutaon sa kapolisan, kasundalohan, sa mga korte kon may mga tulubagon ba nga kaso, aron mas pamadali ang ilang pagkuha sa amnestiya.

Gimbuhaton na sa LAB Bohol ang pagtimbang timbang sa mga aplikasyon alang sa amnestiya ug paghukom kon angayan ba nga makadawat sa nagkadaiya nga tabang gikan sa kagamhanan alang sa mga susama kanila nga nahaylo sa kinabuhing mipili sa duguong pakigbisug. (PIABohol)

PARA SA KALINAW. Gitukod nag opisyal nang makasugod sa trabaho ang LAB nga makaproseso sa mga aplikasyon sa mga kanhi rebelde nga buot makakuhag pasaylo sa ilang mga salaud nga nabuhat dihang nagtrabaho sa kalihukang walhon, sa pagpapanumpa samga sakop sa LAB Bohol. (PIAbohol)