Pabalay sa Eskaya sa Taytay,

Nagpaabut na sa DENR ECC

TAGBILARAN CITY, Bohol, (PIA)— Ang paggawas na lamang sa Environmental Compliance Certificate (ECC) ang gipaabut sa mga tinugyanan aron masugdan na ang 17 ka mga balay nga tukoron sa National Housing Authority (NHA) alang sa mga sakop sa Eskaya didto sa Taytay Duero.

Kini maoy labing bag-o nga kaugmaran sa gitutokan karon nga labing una nga hugna sa mga pabalay nga gitagana sa goberno alang sa mga sakop sa Eskaya, nga biktima sa mga katalagman sa milabay nga mga katuigan.

Matud ni National Commission on Indigenous People’s (NCIP) Bohol field officer Emmilou Gonzaga didto sa Kapihan sa PIA, ang proyekto sa NHA ug NCIP napailawon sa Housing Assistance Program for Indigenous Peoples (HAPIP).

Kahinumduman nga gibutyag ni NHA Bohol Field Officer Genesis Ceasar Manalili nga may 23 ka mga balay nga unang giduso sa NHA alang sa programa.

Gani, gidugang sa NHA nga ang pundo karon, anaa na sa lungsod, butang nga gikompirmar na usab sa NCIP.

Apan, tungod sa kalangan sa pagpakuha sa mga gikinahanglang mga permits ilabi na kay ang Taytay Duero nasulod isip tinubdan sa gipanalipdan nga tubig-saluran (watershed) sa Alejawan, gikinahanglan ang clearances gikan usab sa mga pundok nga natahasan pagpanalipod sa protected area, matud ni Manalili.

Gawas sa pagkuha sa mga dokumento, gikonsiderar usab sa NHA ang desinyo sa balay, ang luna nga tukoran ug ang konsiderasyon nga ang kultura sa mga Eskaya, dili matamakan, mao nga milanat og taas nga panahon ang proseso.

Kalakip sa mga gikinahanglang mga pagtugod ang Protected Area Management Board (PAMB) Resolution nga nagtugot sa pagpabarug sa mga kabalay, isip PAMB Clearance.

Niining bag-o, napagawas na ang PAMB Clearance matud pa ni Gonzaga.

Apan sa lanat sa panahon, gikan sa 23 ka balay, sa pagsaka na usab sa presyo sa mga materyales, igo na lamang ang pundo alang sa 17 na lang ka mga balay.

Nagtuo hinuon ang NCIP nga mapagawas na ang ECC sa Department of Environment and Natural Resources (DENR) sa dili madugay, butang nga makapasugod na dayon sa pagpatukod, ilabi na aron pagtimaan sa nasudnong paghandum sa ika 28 ka tuig human mapagawas ang Indigenous People’s Rights Act (IPRA).

Ang IPRA ang balaod nga nagpanalipod sa mga katungod sa mga Indigenous Peoples sama sa mga sakop sa Eskaya, ug naghatag kanila og dyutay nga pabor isip sector nga kanunay mabiyaan sa serbisyo sa kagamhanan. (PIABohol)

HAPIT NA. Gawas sa gipaabut nga ECC, mahimong ikapatukod na sa dili madugay ang mga kabalayan nga gitagana sa goberno ngadto sa mga Eskaya didto sa Taytay Duero, matud ni NCIP Emmilou Gonzaga didto sa Kapihan sa PIA. (PIABohol)