Libreng lubong alang sa mga kabus, balaod na

TAGBILARAN CITY, Bohol (PIA)--Ang mga kabus nga Pilipino dili na angay mabalaka bahin sa gasto sa pagpalubong human ang Republic Act (RA) 12309, o ang Free Funeral Services Act, nahimo nang balaod.

Ang RA 12309 gisumite ngadto sa Office of the President alang sa paglagda ni Presidente Ferdinand Marcos Jr. niadtong Agosto 28 apan wala gi-aksyonan sulod sa 30 ka adlaw. Ubos sa Artikulo VI, Seksyon 27(1) sa 1987 Constitution, ang maong lakang nahimong balaod.

Ang libre nga serbisyo sa lubong magamit alang sa mga pamilya nga anaa sa “crisis situations,” nga giila sa Department of Social Welfare and Development (DSWD). Naglakip kini, apan dili limitado sa, mga kabus nga pamilya ug mga indibidwal nga naapektuhan sa mga kalamidad, katalagman, o uban pang mga emerhensya nga nagpugong kanila sa paghatag og halangdon nga serbisyo sa lubong.

Ang funeral package naglakip sa pag-andam sa mga dokumento sa lubong, pag-embalsamar, paglubong o serbisyo sa paglubong, transportasyon, cremation, ug mga serbisyo sa inurnment, lakip ang paghatag og lungon, urn, o lugar.

Aron maka-avail sa funeral package, ang namatyan nga pamilya o representante kinahanglang magpakita sa mosunod nga mga dokumento: valid ID sa claimant o beneficiary, death certificate nga gi-issue sa ospital o local government health office, o sertipikasyon gikan sa tribal chieftain; ug usa ka kontrata sa paglubong nga gipirmahan sa representante sa pamilya, sa funeral establishment, ug usa ka awtorisadong DSWD personnel, nga adunay social case study nga gihimo sa usa ka rehistradong social worker.

Isip nanguna nga ahensya nga gitahasan sa pagpatuman sa balaod, ang mga rehiyonal nga buhatan sa DSWD maoy moabaga sa gasto sa mga serbisyo nga gihatag sa mga funeral establishments human maaprobahan sa ilang tagsatagsa ka regional directors.

Ang pagbayad ibase sa gitakda sa gilagdaan nga kontrata tali sa representante sa pamilya, sa funeral establishment, ug sa awtorisadong DSWD personnel.

Ang inisyal nga pondo alang sa RA 12309 adto kuhaon sa Assistance to Individuals in Crisis Situations (AICS) program sa DSWD o uban pang susamang mga inisyatiba. (ECB/PIA7-Bohol)

Ang mga kabus nga pamilyang Pilipino makapahimulos na sa libreng serbisyo sa lubong ubos sa bag-ong gipatuman nga Republic Act No. 12309 o ang Free Funeral Services Act — nga nahimong balaod niadtong Setyembre 28, 2025, bisan walay pirma ni Presidente Ferdinand Marcos Jr.. Ang maong lakang nahimong balaod human ang Presidente walay aksyon sulod sa 30 ka adlaw sa pagkadawat niini gikan sa Kongreso, sumala sa gilatid ubos sa 1987 Constitution. (ECB/PIA7-Bohol)