DA, mopakanaug sa giya’s LGUS

sa agricultural land conversions

TAGBILARAN CITY, Bohol, (PIA)— Sa kahingawa nga mapun-an pa ang mga conversions sa mga humayan ngadto sa mga lugar nga dili na matamnan ug mameligro na hinuon ang suplay sa pagkaon, himoon sa Department of Agriculture (DA) ang pagpakatap sa kasayuran aron kagamhan ang mga local nga kagamhanan sa pagpugong sa illegal nga mga conversions ilabi na sa paghimo sa ilang Comprehensive Land Use Plans (CLUP) ug Zoning Ordinances (ZO).

Mismo si DA Regional Executive Director Angel Enriquez, pinaagi sa Regional land Use Technical Working Group ug sa Bureau of Soils and Water Management ubos sa Agricultural Land Management and Evaluation Division, ang nanapit sa mga LGUS sa pagtambong sa pagpakanaug sa kasayuran kabahin sa mga sumbanan sa ingon niining land conversions.

Matud ni Enriquez, ang kalihukan nga himoon sa Kew Hotel sa Oktubre 21 ug 22, gitumong sa pagpatin-aw sa mga polisiya nga gilagda ubos sa DA Memorandum Circular No. 26, series of 2022.

Ang nahisgutan nga memorandum, naglagda sa pagpagawas sa DA Certificates nga gikinahanglan sa dili pa makahimo ang mga kalungsuran sa land reclassification.

Ang giya, mahinungdanon alang sa mga LGUS aron malamdagan sa ilang pagpabag-o ug pag-update sa ilang mga CLUPS ug ZOs, aron mahiusa na kini sa nasudnong mga prayoridad ilabi na sa panguma, ug sa pagtuman sa mga balaod ug reglamentos kabahin niini.

Nunot niini, giaghat sa DA ang mga mayor sa kalungsuran sa Bohol nga magpadala sa ilang mga Municipal Planning and Development Officers ug Municipal Agriculturists o ang mga matumbok nga representante niini aron makaapil sa pagpakanaug sa kasayuran.

Dugang ni Enriquez nga ang ilang pag-apil ug pagtambong makatampo unya sa kapasidad sa LGU sa pagsukip sa malungtarong paggamit sa mga yutang umahan ngadto na sa mga laraw sa lungsod sa pag-ugmad. (PIABohol)

SAYON NGA HAYLO. Gikan sa mga humayan, ubay-ubay na ang mga kayutaan sa Bohol nga nahimo na nga residential ug commercial, pinaagi sa yano nga reclassification nga gihimo sa mga LGUS. Kon dili kini mapakgang, hayan magkuwang na ang pagkaon, segun sa DA. (PIABohol)