Dili flood control kun di

Slope protection - NIA

TAGBILARAN CITY, Bohol, (PIA)—Dili flood control kon dili yano nga slope protection.

Kini maoy patin-aw nga giluwatan sa National Irrigation Administration (NIA) agi og pasabut sa gipasangil nga nahunlak nga giingong flood control project sa Valencia, Bohol.

Sa usa ka pahayag, gibutyag sa NIA-7 nga ang nahugmak nga estraktura pulos kinamada nga bato ug semento nga gimasa ug wala na kabilyahe kay kini igo ra pagpugong nga dili makankan ang tampi sa Panangatan Communal Irrigation System (CIS) Diversion Dam ug Main Canal.

Dili kini flood control, matud pa sa NIA.

Ang nahisgutan nga estraktura gitukod niadtong 1990, isip slope protection structure ug gidesinyo aron mopalig-on sa pangpang sa tampi aron dili dali nga mahunlak ang pangpang, dili makabkab sa tubig ang kilid ug makankan ang nahumokan nga pangpang nga again permi sa tubig.

Matud pa sa NIA, ang kadugayon na sa panahon, ang panagsang kusog nga bul-og sa tubig u gang pagpanguha og bonbon sa tiilin nga bahin sa estraktura nakapagabok sa pundasyon sa slope protection, nga miresulta sa pagkahugmak sa minasa.

Niini, gisubay dayun ang nataho nga estraktura sa NIA Region VII uban ni Regional Manager Engr. Eusebio S. Villamanto uban sa Bohol-Siquijor Office Engineering ug Operations Section Chief Evaristo R. Borja, Project-in-Charge Ma. Cesarea Caga-anan ug Institutional Development Officer Severo G. Caipang aron sutaon ang kadaut.

Gikonsulta usab sa NIA ang Local Government Unit sa Valencia, Bohol, ug si Bise Mayor Aristotle Cometa uban ni Municipal Engineer Nino Salvacion ug Chief of Staff Nathaniel Marante alang sa tukmang lakang.

Nahukman didto nga ang nahugmak nga slope protection pagatabangan aron ayohon: ang NIA mopagamit sa ilang equipment unit, ang LGU maoy mohatag sa construction materials apil ang krudo ug oil nga gamiton sa heavy equipment samtang ang mga sakop sa natungdan nga Simang Balingasao Irrigators’ Association maog maghungos aron matrabaho pagpahiuli sa nahisgutang estraktura.

Gawas pa, mingboluntaryo ang NIA nga maoy maghimo og pagkawot sa natapok nga binanlas nga yuta sa ibabaw ug ubos nga bahin sa Panangatan River.

Gipalubad usab sa NIA ang ilang panaad sa pagseguro nga luwas ug magamit samtang napatunhay ang ilang mga estraktura sa patubog pinaagi sa pagpakig-alayonay sa local government units ug mga natungdan’g stakeholders.(PIABohol)

DEPENDE SA GAMIT. Kon ang gitukod, igo ra pagpanalipud aron dili makankan ang pangpang, lahi gyud kini og pagkahimo kon ang tuyo sa pagtukod mao ang pagpugong sa pagbaha, kay mas kusog ang tubig nga kontrolahon sa nauwahi, mao nga kinahanglang lig-on ang pagkatukod ug may kabilya. (PIAbohol/NIA7)