SP Edcom misugyot: mag-abli’g Bohol

authors section sa Provincial Library

TAGBILARAN CITY, Bohol, (PIA)— Gilaraw karon sa Sangguniang Panlalawigan (SP) nga magpanday og ordinansa nga magtulak sa mga Bol-anon nga manunulat ug sa ilang mga obra nga kahatagan sa luna sa Bohol Provincial Library pinaagi sa pagpahimutang sa bag-ong seksyon sa library alang kanila.

Nunot niini, giduso na ang gisugyot nga ordinansa, Provincial Ordinance No. 36-2025, nga magtulak sa mga Bol-anon nga manunulat ug ang ilang napatik na nga mga trabaho, pinaagi sa pagpahimutang sa Local Authors Section sa Provincial Library.

Sa tigum sa SP Education Committee, gisugyot ang nahisgutang lakang ni Board Member Nathaniel Binlod aron ipaneguro nga adunay sayun makit-an nga mga gipatik sa mga Bol-anong manunuwat diha sa Provincial Library.

Gawas pa, buot usab sa proponent nga ang tanang Bol-anon mahatagan og akses sa mga kasayuran ug mga obra sa mga Bol-anao nga magamit alang sa mga estudyante, researchers, mag magtutudlo ug mga Bol-anon na mismo.

Ang Bohol Provincial Library usa na sa giisip nga sentro sa kahibaw ug kaalam ug nagsilbe nga haum ug sayon makit-an nga tipiganan sa mga obra nga mga libro sa mga manunuwat.

Ug, ang pagpahimutang og dedicated nga “Boholano Authors Section” sulod sa library, magpahimong sistema aron mailhan ang mga local nga manunuwat, researchers ug scholars nga makapaaghat sa mga kabataan nga nagtuon sa pagbasa ug pagsuwat ilabi na sa mga hisgutanan kabahin sa kultura ug kapanulondan.

Naglaum ang SP nga kon mahibayon na, kini magtanyag og kritikal nga buhat sa pagpatunhay sa kultura, kapanulundan ug kabiling Bol-anon. (PIABohol)

PAGPATUNHAY SA KAPANULUNDAN. Ang mga Bol-anong hawod sa pagsuwat angay lang usab nga mailhan, ug ang ilang obra makatabang sa pagpakatap sa kasayuran kabahin sa local nga kultura, nga pwede matan-aw usab sa mga researchers ug scholars, pasabut ni BM Binlod. (PIABohol)