Suspensyon og klase gikan Oct. 15

hangtod Dec. 2025, fake news – DepEd

TAGBILARAN CITY, Bohol (PIA)--Ang Department of Education (DepEd) kusganong nihimakak nga ang klase sa tibuok nasud gisuspenso gikan sa Oktubre 15 hangtod Disyembre, 2025.

Ang peke nga balita gipakaylap pinaagi sa pahibalo gikan sa DepEd nga ang klase sa tibuok Pilipinas gikansela tungod sa serye sa mga linog.

Pinaagi sa usa ka Facebook Post sa DepEd Davao Region adlaw’ng Domingo, Oktubre 12, gipatin-aw sa ahensya nga ang klase dili suspendido karon nga buwan hangtod sa Disyembre.

Matud pa nga dili usab tinuod ang balita nga mikaylap sa social media nga nag-ingon nga ang tanan nga mga klase ibalhin sa online ug modular.

“This is WRONG INFORMATION. This is FAKE NEWS. All significant information will be posted here. Please be aware,” gi-klaro sa FB post sa DepEd.

Gipahinumdoman sa DepEd ang publiko nga mag-amping ug susihon og maayo ang kasayuran nga mabasa sa online.

Alang sa mga opisyal nga pahibalo ug kasayuran bahin sa sukaranan nga edukasyon, gi-awhag ang publiko sa pagsunod lamang ang opisyal nga DepEd Philippines Social Media Accounts.

Kahinumdoman nga gitay-og og magnitude 7.4 nga linog ang Manay, Davao Oriental niadtong Biyernes, Oktubre 10 ug gisundan og usa pa ka kusog nga 5.8 niadtong Oktubre 11. (ECB/PIA7-Bohol)

Kusganong gihimakak sa DepEd ang mga gipakatap nga pekeng balita nga gisuspenso ang klase gikan sa Oktubre 15 hangtod Disyembre, 2025 ug ang tanan nga mga klase ibalhin sa online ug modular. (DepEd/PIA)