2 lungsod apil sa 16 LGUS

Nga giila sa SubayBAYANI

TAGBILARAN CITY, Bohol (PIA)— Duha sa 16 ka mga kalungsuran sa nasud nga giila sa Department of Interior and Local Governments (DILG) nga may di hingtupngan nga accomplishment sa dayag nga pagpatuman sa proyekto nga imprastraktura, mga lungsod sa Bohol.

Ang lungsod sa Buenavista ug Loay, nga ania sa Bohol lakip sa 16 ka mga kalungsuran sa tibuok nasud nga gibugtawan sa pasidungog tungod sa pagka sumbanan nga ilang napakita sa pagpatuman sa ilang mga proyekto aron wad-on ang duda sa pangurakot.

Kauban sa Loay ug Buenavista ang Torrijos (Marinduque), Victoria (Tarlac), Capalonga (Camarines Norte), Paracale (Camarines Norte), Santa Elena (Camarines Norte), Alimodian (Panay), Anilao (Batangas), Buruanga (Panay), Larena (Siquijor), Mabinay (Negros Oriental), San Jose (Negros Occidental), Moalboal (Cebu), Bobon ug Catarman (Samar).

Hinuon, ang top performers sa mga municipalities mao ang Victoria, Oriental Mindoro, Sumilao, Bukidnon, and ug Magpet, Cotabato.

Sa mga lalawigan usab, ang Bohol usa sa 16 ka lalawigan nga gi-ila nga mga exemplars.

Kauban sa Bohol ang Ilo-ilo, Negros Occidental, Negros Oriental, Siquijor, Northern Samar, Samar, Southern Leyte, Zamboanga del Sur, Zamboanga Sibugay, Camiguin, Davao de Oro, Saranggani, Sultan Kudarat, Agusan del Sur ug Dinagat Islands.

Top Performers usab sa Subaybayan ang Mountain Province, Zamboanga Sibugay, ug Aklan Province.

Ug sa mga syudad, ang Tagbilaran City usa sa 16 ka mga syudad nga gitumbok nga sumbanan sa SubayBAYANI (SubayBAYANI exemplars) sa ilang dili hingtupngan nga performance sa infrastructure governance ug sa pagmonitor sa pagpatuman sa mga proyekto.

“Dakong garbo sa atong Probinsya ang pag-angkon nato niining maong SUBAYbayani Award. Usa kini ka timailhan nga ang atong administrasyon anaa gayud sa husto ug insaktong direksyon,” matud ni Gobernador Erico Aristotle Aumentado.

Ang maong pasidungog bunga usab sa paningkamot sa matag departamento nga adunay dakong papel sa paghatag ug limpyo, tinud-anay, ug matinud-anong serbisyo alang sa mga Bol-anon, dugang niya.

Sa laing bahin, ang Tagbilaran City, kauban usab sa 16 ka mga syudad nga giila nga sumbanan sa maayong pagpatuman sa imprastraktura niini.

Kauban sa Tagbilaran City Bohol ang Bago City, (Negros Occidental), Bogo City (Cebu), Calapan City (Mindoro), Danao City (Cebu), Iloilo City (Negros Occidental), La Carlota City (Negros Occidental), Las Piñas City (Metro Manila), Parañaque City (Metro Manila), Puerto Princesa City (Palawan) ug San Fernando City (La Union), giila nga exemplars sa dayag nga pagpatuman sa imprastraktura.

Hinuon, sa 2025, ang SubayBayani top performers mao ang 1st place: Pasig City (Metro Manila), 2nd Place: Science City of Muñoz, Nueva Ecija ug ang 3rd Place: Victorias City, Negros Occidental.

The SubayBAYANI Awards gihimo aron ilhon ug pasidunggan ang mga top-performing local government units sa nasud sa dili hingtupngan nga dayag, magpanubag (transparent and accountable) nga pagpatuman sa mga imprastraktura nga gipundohan sa kagamhanan.

Gi organisa sa Department of the Interior and Local Government, ang programa magsuhid sa mga LGUs nga nanguna sa participatory governance, citizen engagement, ug evidence-based monitoring sa pagpatyuman sa infrastructure projects.

Kinatibuk-an nga 126 ka LGUs ang gitumbok nga exemplars ug gipasidungan sa Pavillion sa Manila Hotel Nobyembre 26. (PIABohol)

WA NAY DAGHANG ESTORYA. Luyo sa pasangil sa pangurakot sa pagpatuman sa mga proyekto sa goberno, mismo ang DILG na ang mitumbok sa Bohol nga maayong sumbanan (exemplar) sa mga maayong nagdumala sa mga proyekto pinaagi sa dayag, accountable ug may abot nga makita sa mga ebidensya nga gimonitor sa DILG pinaagi sa SubayBAYAN program. (PIABohol/GAA)