Carmen Choco Hills tourist

arrivals sa Oktubre: misaka

TAGBILARAN CITY, Bohol, (PIA)—Gikan sa 65 mil ka turista nga ming-suroy sa Chocolate Hills niadtong Agosto, nikunhod kini ngadto na sa 50 mil sa buwan sa Septembre apan sa hinapos sa Oktubre, miabut na usab sa 59 mil ang tourist arrivals.

Niini, matud ni Gobernador Erico Aristotle Aumentado, mahimong mihinayhinay na pagkabuhi na usab ang turismo sa atong lungsod sa Carmen human sa off- season.

Dugang sa gobernador nga hapit na masinati sa Bohol sa hingpit nga paglabay sa lean season, apan gipahinumdom niya ang iyang aghat ang mga Bol-anon, ilabi na sa mga nanginabuhi sa industriya: pagmatngon aron dili masudlan sa mga binu-ang.

Sa social media, permi nga gikulata ang turismo sa Bohol kay naangin sa mga mingsakay sa panahon ug mangpuhal ilabi na sa pagpresyo sa mga pagkaon ug serbisyo, ilabi sa mga sakyanan.

Sa mga kalungsuran, may nga tourism offices nga maoy nagdumala sa mga pangturismo nga kalihukan, sila usab ang nasayud sa mga rehistrado ug kolorum nga mga operators.

Tambag sa mga sakop sa Provincial Tourism Council, kon may nakita, namatikdan ug nasinati nga kadudahan nga mga nagpasobra sa presyo, kuhai og hulagway, kuhaa ang pangalan sa tindahan, hotel o resort ug plate numbers sa sakyanan o ubang timailhan sa dili makatarunganon nga pagnegosyo, aron masubay usab sa mga anaa sa permits ug licensing offices.

Sa diskarte sa negosyo, daghan pa gihapon sa Bohol ang buot mamintaha, walay mga lisensya, walay mga permit ug sila pa ang kanunay nga magbinu-ang, saysay sa mga sakop sa konseho, og mga turista nga nakasinati.

Sa tinabangay sa tanan nga buot na usab nga makasinati sa maayong turismo, milaum si Gobernador Aumentado nga kini na ang sinugdanan sa maayo na usab nga tourism cycle. (PIABohol)

HINAY APAN KANUNAY. Nagtuo ang gobernador sa Bohol nga hinay na nga nalingkawasan sa Bohol ang panahon sa tinghinay kay namatikdan nga mingsugod na usab og daghan ang turista. Milaum usab ang gobernador nga tabangan og bantay nga wala nay mopalabaw sa presyo sakay sa higayon, kay kini usa sa mga kabugnawan sa mga turista. (PIABohol)