5 ektarya nga Candanas

Landslide, angay likayan

TAGBILARAN CITY, Bohol, (PIA)— Delikado nga lugar, kini maoy nahukman sa mga tinugyanan human misubay ang Provincial Disaster and Risk Reduction Management Council (PDRRMC) ug sa mga sakop sa Bohol Provincial Environment Management Office geologist nga si Karl Din didto sa nagpadayon pang landslides sa Purok6 ug Purok 1 sa Laca, Candanas Garcia Hernandez.

Ang una nga namatikdan nga pagpangliki sa yuta didto sa pathway pasulod sa barangay, wala na nila damha nga mopadayon na diya ngadto sa lapad nga pagpangahunlak sa yuta, saysay ni Kapitan Anthony Ladesma.

Human sa usa ka semana nga paglihok sa yuta, ang kanhi liki ug laka sa karsada, nahimo na nga lima ka ektarya nga landslide diin ang kinatibuk-an nga aping sa pangpang, nagsigo pa gihapon og dahili ngadto sa ubos.

Gituohan nga nahumokan nga yuta hinungdan nga diha nga nabug-atan, mihinay og kalaka, ang landslaid naka-angin na sa 11 ka mga balay sa Purok 6 ug Purok 1 sa Candanas, nakaputol sa kaagi-an sa mga nanimuyo ditto ngadto sa karsada paingon sa Sawang ug hingpit na nakaputol sa labing duol nga akses sa mga silingang barangay ngadto sa sentro sa Garcia Hernandez.

Ang labing daku nga epekto sa imprastraktura mao ang pagkagun-ob sa 300 metros nga sementado nga pathway nga anaa sa section sa Provincial Road, nga karon, dili na makit-an kay natabunan na sa binanlas nga mga yuta.

Matud ni Kapitan Ladesma, sementohon na unta sa Kagamhanang Probinsyal ang nahisgutan nga seksyon sa karsada, apan gipadayon pa nila ang pagpaniid kay nagsigoe pa gihapon og lihok.

Dugang sa Kapitan, kini na ang ika tulo nga pagpasemento sa barangay sa pathway ug sa katapusang pagtrabaho, wala na igkita pa ang pathway.

Ug tungod kay dili baga nga semento sa naglihok nga yuta, kadali ra kini nga nabungkag ug nangagipok.

Niini, gibutyag usab ni Mayor Jess Baja nga ilkang pabutangan og paskil didto sa bukid aron masayud ang katawhan sa risgo aron likayan una ang lugar. (PIABohol)

DELIKADO. Tungod sa padayon nga paglihok sa yuta, padayag ni Mayor Jess Baja ang kakuyaw sa hulga sa kinabuhi, mao nga isip amahan sa lungsod, alang kaniya, may maayo nga likayan una ang pagtamak sa naglihok nga yuta. (PIABohol/Ric Obedencio)