Kapitolyo, Dakbayan sa Tagbilaran nagka-uyon

nga ipahunong ang proyekto sa Banat-i Hill

TAGBILARAN CITY, Bohol (PIA)--Ang Panggamhanan sa Probinsiya sa Bohol ug ang Kagamhanan sa Dakbayan sa Tagbilaran nagkasabot nga hunongon ang pagpadayon sa orihinal nga proyekto sa Regional Cultural Hub sa Banat-i Hill taliwala sa kabalaka sa kinaiyahan ug pondo.

Si Gobernador Erico Aristotle Aumentado, First District Rep. John Geesnell Yap ug Mayor Jane Yap, uban sa National Commission for Culture and the Arts (NCCA) nagkasinabot nga dili na ipadayon ang orihinal nga disenyo sa proyekto.

Sa hiniusang pahayag, ang grupo nagpamatuod pag-usab sa ilang pasalig sa transparency, pagpanalipod sa kinaiyahan, ug inclusive cultural development.

Matud pa nga wala gi-apil ni Kongresista Yap ang proyekto sa iyang 2026 budget sa kongreso tungod sa posibleng epekto niini sa kinaiyahan.

Samtang gikompirmar sa Department of Public Works and Highways (DPWH) Region 7 nga sa pagkakaron walay magamit nga pondo alang sa proyekto. Ang gisugyot nga Regional Cultural Hub walay alokasyon sa 2026 National Expenditure Program o ang House General Appropriations Bill.

Tungod kay nahuman na ang Phase 1 sa proyekto, ang estraktura idesinyo pag-usab ngadto sa climate-responsive ug environmentally adaptive Public Viewing and Cultural Deck o Open Theater nga adunay panoramic view sa dakbayan sa Tagbilaran, mga lungsod sa Dauis, ug Panglao. Ang gi-redesign nga pasilidad mahimong bukas ug magamit sa publiko, ubos sa pagrepaso ug pag-apruba sa mga hingtungdang ahensya.

Giklaro sa mga opisyal nga walay iregularidad sa proyekto nga nahimutang sa 5.1791 ka ektarya nga propyedad nga gipanag-iya sa Provincial Government.

Gi-klasipikar sa Department of Environment and Natural Resources (DENR) ang maong lugar nga Alienable and Disposable sukad pa niadtong 1927 ug ni-isyu og Environmental Compliance Certificate (ECC).

Plano usab sa Kagamhanan sa Dakbayan sa Tagbilaran nga isugyot ang deklarasyon sa Banat-i Hill nga nahimutang sa Barangay Bool ug Elly Hill sa Barangay Manga, Tiptip, ug Ubujan isip Urban Biodiversity Zones aron masiguro ang balanse ug malungtarong kalamboan. (ECB/PIA7-Bohol)

Ang Panggamhanan sa Probinsiya sa Bohol nipatawag og coordination meeting niadtong Nobyembre 11, uban sa Panggamhanan sa Dakbayan sa Tagbilaran ug mga hingtungdan nga nasudnong ahensya aron hisgutan ang mga update sa pagtukod sa Regional Cultural Hub ug Hall of Justice sa Banat-i Hill sa syudad sa Tagbilaran. Gipangulohan ni Gobernador Erico Aristotle Aumentado ang mga diskusyon, giubanan nila ni First District Congressman John Geesnell Yap ug Tagbilaran City Mayor Jane Yap, kinsa mipamatuod pag-usab sa ilang padayon nga pagtinabangay aron pagseguro nga ang proyekto magpadayon uban ang angay nga pagtagad alang sa kaluwasan sa komunidad, pagpadayon sa kinaiyahan, ug pag-uswag sa kultura. (photo credit: PGBh)