DA-7 nag-awhag sa publiko nga mahimong 'RICEponsible,'

mipalig-on sa mga importanteng mensahe sa ‘ABKD’

TAGBILARAN CITY, Bohol (PIA)--Gipalig-on sa Department of Agriculture (DA) sa Central Visayas ang tinuig nga pag-obserbar sa National Rice Awareness Month (NRAM) karong Nobyembre uban sa nagpadayong tema nga “Be RICEponsibe.”

Gilusad niadtong 2023 ug magpadayon hangtod sa 2028, ang kampanya nagtumong sa pagpalambo sa mas himsog ug mas responsable nga konsumo sa bugas samtang nagsuporta sa mga lokal nga mag-uuma.

“This year’s celebration strengthens the call for mindful rice consumption and stronger support for Filipino farmers (Ang selebrasyon karong tuiga nagpalig-on sa panawagan alang sa mahunahunaon nga konsumo sa bugas ug mas lig-on nga suporta alang sa mga mag-uuma nga Pilipino),” matud pa ni DA-7 information officer Cheryl dela Victoria atol sa Kapihan sa PIA sa syudad sa Tagbilaran niadtong Nobyembre 21.

Ang matag lugas sa bugas, matod ni dela Victoria, usa ka panalangin nga dili gyud angay’ng mausik.

Iyang gipaambit ang mahinungdanong bahin sa inisyatiba nga mao ang ABKD nga kalihokan, nga nag-awhag sa mga konsumidor sa pagsagop sa mahunahunaon nga mga gawi sa bugas:

A – Adlay, mais, saba, atbp. ay ihalo sa kanin (Isagol ang bugas sa ubang staples sama sa adlai, mais ug saba);

B – Brown rice ay kainin (Pilia ang brown o unpolished nga bugas);

K – Kanin ay huwag sayangin (Likayi ang pag-usik sa bugas);

D – Dapat bigas ng Pilipinas ang bilhin (Suportahi ang lokal nga ginaprodyus nga bugas).

Kini nga kampanya nag-awhag sa mga panimalay, eskwelahan, ahensya ug komunidad sa paghimo sa matag lugas nga maihap pinaagi sa pagdawat sa mas himsog nga mga pagkaon ug pagpili sa mga matang sa humay nga masustansya ug malungtarong maprodyus.

Sumala sa mga taho, ang Pilipinas nag-usik-usik sa 650,000 ka tonelada nga pagkaon matag tuig, lakip ang mga 300,000 ka tonelada nga bugas, nga igo na sa pagpakaon sa 5.5 ka milyon nga mga Pilipino sulod sa usa ka tuig.

Niini, ang DA nag-awhag sa mga Pilipino sa pagsugod sa usa ka yano apan gamhanan nga batasan: pagkuha lamang sa imong kayang makaon, o pag-order og tunga sa tasa nga bugas kon igo na. (ECB/PIA7-Bohol)

Sa Kapihan sa PIA niadtong Nobyembre 21, 2025, gipaambit ni DA-7 information officer Cheryl dela Victoria (R) nga ang pagsaulog karong tuiga sa National Rice Awareness Month (NRAM), nagpalig-on sa panawagan alang sa mahunahunaon nga konsumo sa bugas ug mas lig-on nga suporta sa mga Pilipinong mag-uuma. Ang NRAM gisaulog matag Nobyembre aron sa pagpataas sa kahibalo sa publiko sa importansya sa bugas, pagsulbad sa malnutrisyon ug kakabos ug pagpalambo sa nasudnong rice self-sufficiency. (ECB/PIA7-Bohol)