Pagpakanaug sa bansay-bansay

Sa disaster response, pundohan

TAGBILARAN CITY, Bohol (PIA)— Gituki na karon sa Sangguni-ang Panlalawigan sa Bohol ang ordinansahon nga magtahas sa Provincial Disaster Risk Reduction and Management Office (PDRRMO) ug mga ahensya nga may standardized nga training nga maghatag og bansaybansay sa mga Local Disaster Risk Reduction and Management Officers (LDRRMOs) aron mas magamhan ang katawhan sa paghimo sa disaster response.

Sa usa ka pagpadayag, si Board Member Romulo G. Cepedoza mibutyag nga ang ordinansahon maghimong institusyon sa mga mekanismo nga maghatag dugang gahum sa mga LDRRMs aron makahimo sa mga gikinahanglang lihok pagtubag sa mga panginahanglan kon may katalagman.

Ang ordinansahon nga milusot na sa unang pag basa, giulohanan og Ordinansa nga magmandu sa paghimo og Capacitation ug pagbansay-bansay ngadto sa mga kalungsuran ug magtutok sa Orientation and Warning, sa paglatid sa mga sumbanan sa paghimo sa nahisgutan nga bansaybansay, ug ang pagpundo niini.

Kini aron ang tanan magamhan sa usa lamang ka standard sa disaster response.

Gipasabut usab ni Board Member Jiselle Rae Villamor nga bisan kon ang mandatu sa paghatag og bansaybansay apil na sa trabaho sa PDRRMO, tumong sa ordinansa nga mahimo kining regular ug kapunduhan aron ikapatunhay, ug mas sayon na nga makuha sa mga kalungsuran.

Dugang ni BM Cepedoza nga ang mga bansaybansay, libre ug magtanyag og mga lisensya nga magamit sulod sa duha ka tuig sa mga makalabang sa bansaybansay.

Hinuon, dugang niya nga kadtong mga kalungsuran nga buot magpahimo sa gipangayo nga paggahum, mao na ang magpahiluna sa mga kagamitan sa pagbansay, lugar ug ang mga galastohan alang niini.

Ang mga makalabang sa mga bansaybansay mao na usab ang mohimo sa pagpakanaug sa katakus ngadto sa mga barangay, segun sa ordinansahon.

Nunot niini, gisugyot na usab sa resolusyon ang pagpalig-on sa pagbansaybansay alang sa rescue sa sulod sa langub, sa tubig, ug sa bukid aron mas mapataas pa ang kapasidad sa Disaster Response Capabilities sa Bohol. (PIABohol)

PAGPASAKA SA KAPASIDAD SA DISASTER RESPONSE. Himoon na nga regular nga gimbuhaton sa PDRRMO ang pagtanyag og bansaybansay ngadto sa mga kalungsuran, u gang pagbutang og pundo alang niini, mopatunhay sa kalihukan hangtud nga ang tanan magamhan na alang sa angayan nga response. (PIABohol/SP Bohol)