Palay Buy-Back Program

may P26.7 M nga pundo

TAGBILARAN CITY, Bohol (PIA)—GIkan sa P20 milyones, kinatibuk-an na nga P26.7 milyones na ang kasamtangan nga gipahat sa Kapitolyo alang sa pagpatuman sa Palay Buy-Back Program nga tinubdan usab sa Bugas Bol-anon.

Kahinumduman nga ang Palay Buy Back Program gipasugdan niadtong 2020 ug gitawag og ART-160 Buy-Back Program, kanus-a ang kagamhanang Probinsyal ubos ni kanhi Gobernador Arthur Yap, u gang Office of the Provincial Agriculturist (OPA) mitagana og P48 milyones alang sa programa, niadtong ikaduhang tingtanum sa Mayor-Oktubre 2020.

Gilaraw kaniadto ang pagpamalit og balig P10 porsyento sa ani gikan sa 3 mil ektaryas nga humayang gitamnan og hybrid sa tag P20 ang kilo alang sa 14% nga kaugahon ug P1 nga insentibo.

Niiining tuiga, gilusda pag-usab ang Palay Buy-Back Program ubos sa kagamhanang probinsyal ug ni Gobernador Erico Aristotle Aumentado, niadtong Abril 2025.

Matud sa Buhatan sa Provincial Agriculture, ang pagpamalit s amga tipasi sa Palay Buy-Back program alang lamang sa mga mag-uuma nga gitabangan sa Kapitolyo kay wala sila maapil sa gihatagan og mga subsidiya sa nasudnong kagamhanan pinaagi sa Department of Agriculture.

Ubos sa programa, nagpahat ang Kapitolyo og P10 milyones alang sa pagpamalit sa tipasi gikan s amga mag-uumang gisagop sa probinsya sa tag P24 ang kilo alang sa tipasi nga may 14% nga kaugahon.

Human sa unang hugna, gidungagan sa Kapitolyo og laing P10 milyones nga pahat alang sa Palay Buy-Back Program nga karon gibaligya sa malampuson nga ngalan nga Bugas Bol-anon sa tag P35 ang matag kilo sa ginaling.

Gawas sa kasamtangan nga P20 milyones nga pahat, gikuhaan usab sa OPA og P2 milyones ang P8 milyones nga pahat sa buhatan niini alang sa pagpamalit sa abono nga iti sa manok aron mapun-an ang tipasi nga mapalit sa programa ug mahi-apil na ang hybrid nga tipasi, mga inbred ug espesyal nga humay (Special Purpose Rice alang sa laing 1,000,000 ka kilo sa tag P25.00/kilo sa duh aka anihan.

Lain usab nga P4.7 milyones ang gikuha usab sa OPA sa pahat niini alang sa Provincial Rice Program aron idugang sap undo sa Palay Buy Back alang sa susamang katuyuan.

Niini, kinatibuk-ang P26.7 milyones na ang pundo nga magamit sa Kapitolyo alang sa lain na usab nga hugna sa pagpamalit sa humay aron may mas baratong ikatanyag niini ngadto s amga Bol-anong konsumidor. (PIABohol)

MIMIS NGA TAG P36 RA. Sa kasamtangan, may P26.7 milyones na nga pahat ang Kapitolyo alang sa Bugas Bol-anon, ang ginaling nga tipasi nga napalit sa Bohol Palay Buy-Back Program, human ang OPA mipabalhin sa iyang pundo ngadto sa economic enterprise nga nagtabang sa mga mag-uuma nga Bol-anon. (PIAbohol)