Forum aron magpasayon sa

pagnegosyo himoon Nob 28

TAGBILARAN CITY, Bohol (PIA)— Himoon sa kagamhanang Probinsyal kauban sa Department of Trade and Industry ang Bohol Investment Assistance Network Forum, karong Biyernes Nobyembre 28, alas 9:30 sa buntag didto sa Ceremonial Hall sa Kapitolyo.

Ang Forum, gilauman nga makahatag og mahinungdanon nga panglantaw ngadto sa mga nagkadaiya nga hagit nga gisagubang sa mga industriya sa Bohol, agi og pagpangandam sa kaugmaon ug paghatag solusyon niining mga suliran.

Kahinumduman nga niadtong Nobyembre sa imaging tuig, namugna ang BIAN ubos sa pagpandong sa Central Visayas Investment Assistance Network nga gilangkoban sa sector sa publiko ug pribadong mamumuhunan nga nagtutok aron pasayonon pa ang mga rekisitos sa pagsugod og negosyo.

Kini tungod kay misaligon ang BIAN nga ang pagpasayon sa pagpasugod og pamuhunan, makamugna sa business friendly environment, kay sa ilang tinabangay, nagbayloay na silag kasinatian ug pamaagi aron makatabang sa mga nangitag abag alang sa negosyo.

Buot nato nga kahatagan og solusyon ang mga hagit, mas masabtan pa ang pagsinati sa mga proseso sa kagamhanan ilabi na sa pagnegosyo, ug makamugna og kahigayunan nga pamaayohon pa ang sistema aron makaagni og dugang nga mamumuhunan, matud ni Gob Erico Aristotle Aumentado.

Kining tanan usab, samtang magpaseguro nga adunay balance nga pagtimbang sa kalikopan ug pagpatunhay niini ug sa pagkamalungtaron sa katilingban nga atong gialagaran, dugang sa gobernador.

Ang tema sa nahisgutan nga Forum mao ang “Greener Growth: Balancing Development and Environment for Sustainable Prosperity.” (PIABohol)