Kilometrahe 9 sa Anonang

Botong Road, dili kaagi-an

ANONANG VALENCIA, Bohol (PIA)—Wala’y nagtuo nga ang dyutay nga liki sa dalan nga unang namatikdan niadto pang buwan sa Agosto, mao na diay ang sinugdanan sa pagkahagsak sa dalan nga anaa tungod sa 9.66598 ° (degrees) north, 124.19329 ° (degrees) East sa Anonang Valencia-Genoveva Road.

Tungod niini, ang dalan sa kilometrahe 9 sa Canmanico-Genoveva ngadto na sa Botong-Canlambong - Montevideo Carmen, putol pa ug dili kaagi-an sa 4 wheeled vehicles, hangtud nga maayo ang nalaka nga gibanabana nga 50 metros nga karsada, matud ni Kapitan Nerio Rara.

Hinuon, ang nasampit nga section sa dalan, kanunay na nga makasinati og pagpangliki, nga mahimo nga ayohon ra usab sa Office of the Provincial Engineers nga maoy natahasan sa pagmintinar sa nahisgutan nga Provincial Highway.

Masubay halos mga 9 kilometros gikan sa sentro sa Valencia subay sa Canmanico-Genoveva Road, ang dalan nga nahugmak ug mingdahili, wala pa makaabut sa Anonang Elementary School ug gibanabana nga kapin pa sa kilometro ang sentro sa barangay gikan niini.

Gitumbok ni Kapitan Rara nga segun sa pagpakisusi sa mga tinugyanan sa Provincial Disaster and Risk Reduction Council, usa ka nakawa nga bahin sa bukid ibabaw sa karsada ang permi nga maka-ingon sa pagpangalaka, kay inig awas sa tubig, kini ang mopahumok sa yuta nga mosubay sa dagayday ngadto sa karsada.

Ang pagdahili ug pagkahunlak sa karsada, naka-angin ugsa sa tuko ka mga balay nga mahimong dili na luwas puy-an, tungod sa delikado nga pagpangliki sa yuta.

Matud usab ni Floresa Maisa Cagaanan, anak sa tag-iya sa usa sa tulo ka balay nga delikado nga maangin, mas delikado na ang ilang kahimtang dala sa padayon nga pagpangliki sa yuta nga anaa na sa ilang nataran.

Dugang ni Kapitan Rara, may napadala na ang Kapitolyo nga mga heavy equipment aron maoy motrabaho sa apektado nga section sa karsada, apan tungod sa duha ka nagsunod nga bagyo, mas migrabe ang liki ngadto na sa pagkahunlak sa entiro karsada.

Nasugdan na unta og trabaho sa mga kaminero sa Kapitolyo ang karsada apan ang uwan nga dala ni bagyong Tino ug Uwan, nagpabanlas na hinuon usab sa ilang gikamada nga filling materials.

Hangtud nga mo-undang ang uwan ug dili pahimoan og permanente nga solusyon, kon tambak lamang ug imburnal ang gamiton, hayan dili gihapon kini magdugay, tungod sa nagpabiling hulga sa tubig nga nag-awas dagayday ngadto sa nahumokan nga karsada. (PIABohol)