Mga mag-uuma sa Bohol gipasidunggan atol

sa NRAM, Rice Festival Farmers’ Big Day

TAGBILARAN CITY, Bohol (PIA)--Gipasidunggan ang mga mag-uuma, agricultural extension workers (AEW) ug mga Municipal Agriculturists atol sa gipahigayong National Rice Awareness Month (NRAM) uban sa Rice Festival Farmers Big Day sa lungsod Garcia Hernandez niadtong Nobyembre 22, 2025.

Ang kalihokan miila ug mipasidungog sa dakong papel sa mga mag-uuma nga maoy mihatag ug mipakaon sa tibuok nasud ug sa katawhang Pilipino.

Matag tuig sa bulan sa Nobyembre, ipahigayon ang NRAM-Rice Festival cum Farmers Big Day, nga nasugdan niadtong giselebrar ang National Year of Rice, ug nagpadayon hangtod karon.

Ang maong kalihokan gitambongan ni Senator Francisco Pangilinan, nga maoy nagsulat sa Sagip Saka Act isip keynote speaker.

Niadtong buntag sa Nobyembre 22, 2025, sa pagbukas sa kalihokan sa NRAM Rice Festival, gipahigayon ang pag-display ug contest sa mga rice-based kakanin sama sa budbod, puto, biko, nilambid, bibingka ug uban pa, nga gi-apilan sa unom (6) ka grupo sa naasoy nga lungsod, diin gisponsor kini sa mga private nga kompanya.

Gihingusgan usab ang mensahe o key messages sa ABaKaDa, pinaagi sa rationale, nga gihatag ni Liza Quirog, ang Provincial Agriculturist sa Bohol.

Si Gobernador Erico Aristotle Aumentado sa iyang mensahe mipamatuod pag-usab sa suporta sa Kagamhanan sa Probinsiya alang sa mga mag-uuma sa Bohol, nga nag-ila sa ilang mahinungdanong tahas sa pagpatunhay sa mga komunidad ug pagsiguro sa seguridad sa pagkaon.

Si Senator Pangilinan, sa iyang mensahe mi-presentar sa Sagip Saka Act (RA 11321), nga iyang gimugna ug gi-sponsor, aron pagpalig-on sa suporta sa gobyerno alang sa mga mag-uuma ug mangingisda pinaagi sa pagpalambo sa negosyo, pagpalambo sa access sa merkado, financing, teknolohiya, ug uban pang serbisyo sa suporta.

Gikan sa iyang kaugalingong mga kasinatian sa pagpanguma ug sa mga hagit nga dala sa mga natural nga kalamidad, gipasiugda sa Senador ang panginahanglan sa padayon nga suporta sa sektor sa agrikultura.

Gipasidunggan usab ang mga mag-uuma pinaagi sa ilang SUHID awards ug ang lungsod nga nasakop sa gitawag nga Vegetable Corridor nga mao ang Garcia Hernandez, Valencia, Jagna, Sierra Bullones, Duero ug, Guindulman.

Ang Office of the Provincial Agriculturist (OPA) mitugyan usab sa 7 ka HDPE fish cages, fish feed, ug seaweed inputs ngadto sa 10 ka People's Organizations, uban sa vegetable corridor farm inputs alang sa mga lungsod sa Valencia, Garcia Hernandez, Jagna, Duero, Guindulman, ug Sierra Bullones (ECB/PIA7-Bohol)

Atol sa pagsaulog sa National Rice Awareness Month ug Rice Festival Farmers Big Day sa lungsod Garcia Hernandez niadtong Nobyembre 22, 2025, gi-presentar usab sa programa ang Suhid sa Malampusong Mag-uumang Bol-anon Awards, pag-ila sa Top 10 Highest Yielders sa hybrid ug inbred rice production, ug mga acknowledgement ubos sa Vegetable Corridors: Bol-anong Busog ug Himsog Program. (hulagway sa PGBh)